Kudynnow Golusogneth

1Ny yll tus rych koska, ow prederi a'ga pythow;

aga yeghes yw distruys.

2Ny yll voghosogyon koska, ow prederi a'ga pygans;

kepar ha kleves sevur yw.31:2 Amendys. Gwersow 1 ha 2 yw ankler y'n Greka ha'n Ebrow.

3An den rych a lavur dhe greuni golusogneth,

ha pan bowes lenwys yw gans y daklow denteth.

4An boghosek a lavur rag gul bewedh tanow,

ha pan bowes ev a dheu ha bos yn esow.

5Neb a gar owr ny yll bos reknys ewn;

neb a hol mona a vydh hembrenkys yn sowdhan ganso.

6Lies re dheuth dhe anfeusi drefenn owr,

ha'ga distruyans re's metyas fas orth fas.

7Men trebuchya yw dhe'n re yw ravshys ganso,

ha pub foll a vydh kechys ganso.

8Gwynn y vys an den rych yw kevys divlam,

ha nyns eth war-lergh owr.

9Piw yw ev, ma'n gelwyn gwynnvys?

Rag ev re wrug marthusyon yn mysk y bobel.

10Piw re beu prevys ganso ha bos kevys perfydh?

Bedhes ragdho skila rag bostya.

Piw a'n jevo galloes treuspassya mes ny dreuspassyas,

po gul drog ha ny'n gwrug?

11Y sewenyans a vydh fastys,

ha'n kuntelles a dheriv manylyon y alusenow.

Kortesi orth Moes

12Pan vydhydh esedhys orth moes hel,

na vydh gargasenn ena,

ha na lavar, ‘Yma boes splann omma!’

13Porth kov, lagas pith dhe vos neppyth drog.

Pyth re beu kreatys moy pith ages an lagas?

Rakhenna dagrewi a wra pub treveth.

14Na ystynn dha leuv rag pup-tra a welydh

ha na's herdh gans dha gentrevek y'n skudell.

15Barn omglewans dha gentrevek herwydh dha omglewans dha honan,

ha bydh prederus yn pub mater.

16Deber an pyth yw gorrys a-ragos avel den,

ha na dhyns yn pith, ma na vi kesys.

17Bydh an kynsa dhe hedhi dell dhelledh dhe norter da,

ha na vydh gargasenn, ma na vi divlas.

18Mars os esedhys yn mysk lies,

na ystynn dha leuv yn kynsa oll.

19Boghes yw lowr rag den dyskyblys yn ta.

Ny anell yn poes hag ev y'n gweli.

20Hun yaghus a greg war voesa yn temprys;

ev a sev a-varr hag omglewes yagh.

Ankres anhun ha penn-dro

ha koler a vydh dhe'n gargasenn.

21Mar peus konstrynys dhe dhybri re,

sav, gas an moes dhe hwyja ha ty a' fydh difres.

22Goslow orthiv, ow mab, ha na wra anvri dhymm,

hag y'n diwedh ty a wodhvydh bos gwir ow geryow.

Yn pup-tra a wredh bydh skentel,

ma na dheffo kleves warnas.

23Tus a vennik an den yw hel gans boes,

ha len yw aga dustuni dh'y helder.

24An sita a grodhvol war an dhen yw pith gans boes,

ha'ga dustuni dh'y bithneth yw kewar.

Temprans owth Eva Gwin

25Na assay previ dha wouroleth der eva gwin,

rag gwin re dhistruis lies.

26Dell yw horn prevys yn forn ha dowr,

yndellma gwin a brev kolonnow an re woethus pan strivyons.

27Gwin yw haval dhe vewnans dhe dus

mars yw evys yn kemusur.

Pyth yw bewnans dhe dhen heb gwin?

Rag y feu gwrys rag gul dhe dus bos lowen.

28Gwin evys yn temprys hag y'n termyn ewn

a dhre heudhder dhe'n golonn ha lowender dhe'n enev.

29Gwin evys re a dhre hwerowder an spyrys,

gans diwostytter ha trebuchya.

30Medhwynsi a ynkress sorr an foll dh'y bystik y honan,

ow lehe y nerth ha keworra goliow.

31Na geredh dha gentrevek yn kevewi a win,

na'y dhispresya yn y lowender;

na gows ger a geredh dhodho,

na poesa warnodho dhe attal kendon.