Fara orth Gwledh

1Mars os gwrys mester an wledh, na ughelha dha honan;

bydh yn aga mysk avel onan a'ga niver.

Gwith i yn ta yn kynsa hag ena esedh;

2pan gollenwsys oll dha dheverow, kemmer dha le

may fi heudh war-barth gansa

ha degemmeres torgh rag gwledh restrys mar dha.

3Kows, ty neb yw kottha, rag yth yw dha wir,

mes gans skentoleth kewar, ha na woderr an menestrouthi.

4Le may ma kan kenys, na dhever kows;

na dhisplet dha sleyghneth y'n termyn kamm.

5Sel a rubi settys yn owr

yw keskan a venestrouthi orth gwledh win.

6Sel a wyrven settys rych yn owr

yw melodi menestrouthi gans gwin da.

7Kows, ty neb yw yowynk, mars yw res,

mes namoy es diwweyth, ha marnas y feu govynnys orthis.

8Bedhes dha gows berr; lavar meur yn boghes geryow;

bydh avel neb a woer hag a yll tewel.

9Yn mysk brasyon na omwra par dhedha;

ha pan vo ken den ow kewsel, na glapp.

10A-rag an taran yth a an lughes,

hag yth a favour a-rag an den uvel.

11Sav a dermyn da ha na vydh an diwettha;

ke yn uskis dhe-dre, ha heb hokya.

12Ena lowenha, oll dell vynni,

mes na begh drefenn kows goethus.

13Mes dres oll bennik dha Greador,

neb a'th lenow a'y rohow da.

Own an Arloedh

14Neb a hwila Duw a dhegemmer y dhyskybleth,

ha'n re a sev a-varr dh'y hwilas a gyv favour.

15Neb a hwila an lagha a vydh lenwys ganso,

mes an falswas a drebuch orto.

16An re a berth own a'n Arloedh a gyv gwir vreusow,

hag enowi oberow gwiryon avel golow.

17Peghador a skon keredh,

ha kavoes ervirans orth bodh y vrys.

18Ny skon gour poellek profyans prederus;

ny gren den tont ha goethus yn own.

19Na wra travyth heb ombrederi,

hag unnweyth pan y'n dallethsys, na dreyl dha vrys.

20Na ge war hyns leun a beryllow,

ha na drebuch war dir meynek.

21Na vydh re fydhyansek war fordh rag own a ladron,

ha bydh war a'n pyth usi a-dryv dhis.

Na drest yn fordh an debeles,

ha bydh gwarnys a'th hynsyow.

22Gwith dha enev dha honan yn oll dha fordhow,

rag neb a wra henna a with an worhemmynnow.

23Gwith dha enev dha honan yn oll dha weythresow,

rag neb a wra henna a with an worhemmynnow.

24Neb a with an lagha a with y enev y honan,

ha ny vydh shamys neb a drest yn Arloedh.32:24 Gwersow 21-24 ow siwya an Ebrow.