1Ny hwer drogedh vyth dhodho ev neb a berth own a'n Arloedh,

mes yn peryll ev a'n delirv arta hag arta.

2Ny gas gour fur an lagha,

mes an falswas a vydh avel skath yn tewedh.

3Den fur a fydh y'n lagha;

ha ragdho an lagha a vydh mar drestys avel Urim.33:3 Urim: Ow siwya an Ebrow.

4Pareus an pyth dhe leverel, may fydhydh klewys;

rester dha dhyskans, hag ena ro dha worthyp.

5Kolonn an foll yw haval dhe ros kert,

ha'y brederow avel aghel ow rosella.

6Koweth neb a wra ges yw avel margh

ow kryghias yn-dann pub huni yw esedhys warnodho.

Eghennow Dihaval a Dus

7Prag yth yw unn jydh gwell es onan arall,

pan yw golow pub dydh an vlydhen dhiworth an howl?

8Dre wodhvos an Arloedh i a veu dissernys,

hag ev a ordenas an sesonyow dihaval ha'n goelyow.

9Re anedha ev a ughelhas ha'ga sanshe,

ha re ev a wrug dydhyow kemmyn.

10Mab-den oll a dheuth a'n leur,

hag Adam a veu gwrys a'n dor.

11Yn leunder y skians an Arloedh a dhissernyas yntredha

hag ordena aga fordhow divers.

12Re anedha ev a vennigas ha'ga ughelhe,

re erell ev a sanshas ha'ga dri nes dhodho y honan;

mes nebes ev a vollethis hag iselhe,

ha'ga threylya yn-mes a'ga thylleryow.

13Avel pri yn leuv an priweythor,

dhe vos molys dell bleg dhodho,

yndellma yth yw tus yn leuv aga Kreador,

dhe ri dhedha dell vynn ev.

14Da yw an gorthenep dhe dhrog,

ha bewnans an gorthenep dhe vernans;

yndellma an peghador yw an gorthenep dhe'n den duwek.

15Ytho mir orth oberow oll an Ughella;

i a dheu yn koplow, an eyl gorthenep dh'y gila.

16My o an diwettha dhe woelya;

avel den a guntell gesigow war-lergh kuntelloryon an gwinreun;

17dre vennath an Arloedh my a dheuth yn kynsa,

hag avel kuntellor an gwinreun my a lenwis ow gwinwask.

18Ombrederewgh ma na lavuris ragov vy ow honan,

mes rag peub usi ow hwilas dyskans.

19Klewewgh vy, hwi yw meur yn mysk an bobel,

ha hwi hembrenkysi an kuntelles, goslowewgh!

Bos Anserghek

20Dhe vab po gwreg, dhe vroder po koweth,

na ro galloes warnas dha honan, hedre vewi;

ha na ro dha bythow dhe gen onan,

rag own ty dhe dreylya dha vrys may fydh res dhis y wovynn arta.

21Hedre vi bew hag anall ynnos,

na as nebonan dhe gemmeres dha le.

22Rag gwell yw dha fleghes dhe wovynn ahanas

ages ty dhe vires orth leuv dha fleghes.

23Bydh an gwella yn pup-tra a wredh;

na dhre namm war dha enor.

24Pan worfennydh dydhyow dha vewnans,

hag yn eneworres, lesrann dha eretons.

Dyghtyans Gwesyon

25Boes ha gwelenn ha beghyow rag asen;

bara ha dyskybleth rag kethwas.

26Gwra dhe'th kethwas gweytha ha ty a gyv powes;

mes gas y dhiwleuv diek hag ev a hwila rydhses.

27Yew ha kabester a gromm an konna,

ha dhe'n drogservyas yma restell ha tormentys.

28Gorr ev dhe weytha, ma na vo diek,

29rag diekter a dhysk meur dhrog.

30Dannvon ev dhe weytha, dell dhegoedh dhodho,

ha mar nyns yw gostydh, gwra poes y gargharow.

Na vydh re gales dhe dhen pynag

ha na wra travyth heb ewnder.

31Mars eus dhis servyas, dyght ev kepar ha ty dha honan,

rag ty dh'y brena gans goes.

Mars eus dhis servyas, dyght ev avel broder,

rag edhomm a' fydh anodho dell vydh edhomm dhis a'th vewnans.

Mara'n tebeldhyght hag ev a wra dha asa ha poenya dhe-ves,

py fordh a gemmerydh dh'y hwilas?