Hunrosow a Doell

1Govenegow gour diboell yw euver ha fals,

ha hunrosow a re eskelli dhe fellyon.

2Avel den a gach skeus ha holya an gwyns,

yndella yw neb a wra vri a hunrosow.

3Nyns yw an pyth a welir yn hunrosow marnas skeusenn,

hevelenep fas yn gweder-mires.

4A neppyth avlan pyth a yll bos glanhes?

Hag a neppyth fals pyth a yll bos gwir?

5Dewinieth ha koelyow ha hunrosow yw euver,

hag yma fantasis dhe'n golonn, dell eus dhe wreg yn gwelivesi.

6Marnas aga bos dannvenys yn visitasyon an Ughella,

na sett dha golonn warnedha.

7Rag hunrosow re doellas lies huni,

ha'n re a worras aga fydhyans ynna re goedhas dhe-ves.

8Heb gowyow a'n par ma an lagha a vydh kollenwys,

ha furneth yw kowlwrys yn ganow lel.

Prevyans avel Dyskador

9Gour a dravalyas yn feur a woer lies tra,

ha neb a'n jeves prevyans meur a woer an pyth a dhiskler.

10Den heb prevyans a woer boghes traow,

mes ev neb re vyajyas a gyv skians meur.

11Pan esen ow kwandra, my a welas lies tra,

ha my a gonvedh moy es dell allav leverel.

12Yn fenowgh my re beu yn peryll a vernans,

mes diank grasow dhe'n prevyansow ma.

Own an Arloedh

13Spyrys an dus ownek a vew,

rag yma aga govenek ynno ev neb a's selow.

14Ny vydh gohelus neb yw ownek a'n Arloedh,

na ny berth dout, rag ev yw aga govenek.

15Gwynn y vys an enev yw ownek a'n Arloedh!

War biw y kreg? Ha piw yw y skoedhyans?

16Yma dewlagas an Arloedh war an re a'n kar,

skoes galloesek ha skoedhyans krev,

goskes a'n gwyns toemm ha skeus a'n howl y'n hanter-dydh,

goelyador erbynn trebuchya ha gweres erbynn koedha.

17Ev a dhrehav an enev ha golowi an lagasow;

ev a re yeghes, bewnans ha bennath.

Offrynnow

18Sakrifis gwrys a neppyth degemmerys yn anewn yw nammys.

Ankemmeradow yw rohow an re gammhynsek.

19Nyns yw an Ughella pes da gans offrynnow an re dhidhuw,

na nyns yw diserrys gans meur a sakrifisow.

20Avel den a ladh mab a-dherag y das

yndella yw an den a offrynn sakrifis a bythow an voghosogyon.

21Bara edhommogyon yw bewnans boghosogyon;

neb a'n kemmer a-dhiworta yw den a woes.

22Kemmeres pygans kentrevek yw gul moldrans;

Frowsya arvethesik a'y wober yw skoellya goes.

23Unn den pan dhrehav ha'y gila a dhistru,

pana les a vydh dhedha marnas lavur kales?

24Unn den pan wormel ha'y gila a volleth,

orth lev piw y woslow an Mester?

25Unn den mar omwolgh wosa tochya korf marow, hag ena y dochya arta,

pandr'yw an gwayn der y wolghi?

26Ytho unn den mar kwra penys rag y beghosow,

ha mos ha gul an keth taklow arta,

piw a woslow orth y bysadow?

Ha pandr'a waynyas der omuvelheans?