An Lagha ha Sakrifisow

1Gwitha an lagha a dal lies offrynn;

gul vri a'n gorhemmynnow a dal sakrifia offrynn kres.35:1 Niverow an gwersow y'n chaptra ma a siw niverow Rahlfs Septuaginta.

2Attal kuvder a dal offrynn greun,

ha ri alusen a dal offrynn grasyans.

3Omwitha rag drogedh yw plegadow dhe'n Arloedh

hag omwitha rag anewnder yw prenedh.

4Na omdhiskwedh a-rag an Arloedh gwag dha leuv;

gwra oll an sakrifisow ma, herwydh an gorhemmynn.

5Offrynn den gwiryon a ur an alter,

ha'y odour hweg a sev a-rag an Ughella.

6Sakrifis gour gwiryon yw kemmeradow

ha ny vydh nevra ankevys.

7Bydh hel pan wordhydh an Arloedh,

ha na leha kynsa frut dha dhiwleuv.

8Gans pub ro bedhes lowenek dha fas,

ha sansha dha dhega gans lowender.

9Ro dhe'n Ughella dell ros ev dhis

ha mar hel dell yllydh.

10Rag an Arloedh a attal,

hag ev a attal dhis seythplek.

Barn Duw

11Na brof dhodho falswober, rag ny'n degemmer;

ha na drest yn sakrifisow anewn;

12rag an Arloedh yw an barner,

ha ganso nyns eus faverans.

13Ny dhiskwedh faverans erbynn an boghosek

mes ev a glew pysadow an den dregynnys.

14Ny skon pysadow an omdhivas

na'n wedhwes pan dhiver krodhvol.

15A ny wra dagrow an wedhwes resek war hy bogh

ha hi ow kria erbynn an den a wra dhedha koedha?

16Ev neb a serv an Arloedh a vydh degemmerys gans favour,

ha'y bysadow a dhrehedh dhe'n kommol.

17Pysadow an den uvel a wan an kommol,

ha ny bowes bys pan dhrehedh dh'y amkan;

18ny hedh bys pan worthyp an Ughella

ha gul gwirvreus dhe'n ewnhynsek, ha gul breus.

19Rag ny vydh hyll an Arloedh

hag avel gwerryor ny fronn y honan35:19 hag avel gwerryor ny fronn y honan: Ow siwya an Ebrow.

20bys pan vrew klunyow an re dhidruedh

ha tyli dial war an kenedhlow;

21bys pan dhistru routh an re orgelus,

ha terri ternwelenn an re gammhynsek;

22bys pan attal dhe bub den herwydh y weythresow

hag oberow tus herwydh aga brys;

23bys pan vreus ken y bobel

ha gul dhedha lowenhe yn y dregeredh.

24Teg yw tregeredh yn termyn ahwer

avel kommol glaw yn termyn syghor.