Pysadow rag Pobel Dhuw

1Kemmer truedh ahanan, A Arloedh Duw a beub, ha mir warnan

ha gorr own ahanas war oll an kenedhlow.36:1 Niverow an gwersow y'n chaptra ma a siw niverow Rahlfs Septuaginta.

2Drehav dha leuv erbynn kenedhlow estren

ha gas dhedha gweles dha nerth.

3Dell veus sanshes ynnon a-ragdha,

yndella bydh meurhes yn aga mysk a-ragon.

4Ha gas dhedha godhvos, dell wodhven ni,

nag eus Duw marnas ty, A Arloedh.

5Ro toknys nowydh ha gwra marthusyon erell;

gwra dha leuv ha bregh dhyghow dhe vos gloryus.

6Difun dha sorr ha dinew dha gonnar;

kemmer dhe-ves an erbynner ha distru an eskar.

7Berrha an termyn, porth kov a'n ambos,

ha gas an bobel dhe dherivas dha oberow galloesek.

8Gas an dianker dhe vos leskys yn sorr tanek,

ha re gaffo distruyans an re a bystik dha bobel.

9Brew pennow pennsevigyon an eskar,

a lever ‘Nyns eus denvyth marnas ni.’

10Kuntell oll loethow Yakob,

ha ri dhedha oll aga eretons kepar hag y'n dalleth.

11Kemmer truedh, A Arloedh, war an bobel gelwys gans dha hanow,

war Ysrael a gemmersys avel dha gynsa genys.

12Kemmer pita orth sita dha sentri,

Yerusalem, tyller dha bowesva.

13Lanw Sion a solempnyans dha veuredh,

ha dha dempel a'th wolewder.

14Ro dustuni dhe'n re a formsys y'n dalleth,

ha kollanw an profoesansow kewsys y'th hanow.

15Gober an re a wra dha wortos,

ha gas dha brofoesi dhe vos lel.

16Klew, A Arloedh, pysadow dha servysi,

herwydh bennath Aron war dha bobel,

17ha peub usi war an nor a wodhvydh

dha vos an Arloedh, Duw an oesow.

Dewisyans Gwreg

18An dorr a gemmer boes pynag,

mes an eyl boes yw gwell ages y gila.

19Dell vlas an stevnik helgik divers,

yndellma brys poellek a yll dissernya fals eryow.

20Brys gorth yw an acheson a anken,

mes den a brevyans a'n attal dhodho.

21Benyn a gemmer den pynag avel gour,

mes unn vyrgh yw gwell ages hy ben.

22Tekter benyn a jer an fas,

hag a dremen pub hwans denel.

23Mars yw hy thaves kuv hag uvel,

hy gour yw moy feusik ages gwer erell.

24Ev neb a gyv gwreg a dhalleth perghennogeth,

gweres gwiw dhodho ha koloven powes.

25Le ma nag eus ke, an splatt a vydh pyllys,

ha le ma nag eus gwreg, gour a wander yn unn hanasa.

26Rag piw a fydh yn lader skav

a derlemm a dre dhe dre?

27Ytho piw a fydh yn den na'n jeves neyth,

neb a wodrik yn le pynag ma'n kemmer an nos?