Fals Kowetha

1Pub koweth a lever, ‘My yw dha goweth ynwedh’;

mes yma koweth nag yw koweth marnas yn hanow.

2A nyns yw ahwer bys y'n mernans

pan dreyl keskoweth ha kar yn eskar?

3A blegyans dhe dhrog! a ble rolsys a-ji

dhe gudha an dor sygh a doell?

4Yma keskoweth a lowenha yn sewena koweth,

mes yn termyn trobel ev a dreyl er y bynn.

5Yma keskoweth a weres koweth erbynn eskar,

ha kemmeres skoes yn-bann dh'y dhefendya erbynn eskerens.37:5 Amendys war-lergh an Ebrow.

6Na ankov koweth yn batel,37:6 yn batel: Ow siwya an Ebrow.

ha na wra y ankevi y'th wolusogneth.

Kusulyadoryon

7Pub kusulyador a wormel an gusul a re,

mes yma neb a re kusul dh'y wayn y honan.

8Bydh war a gusulyador,

ha godhvydh yn kynsa pyth yw y vern,

rag ev a re kusul herwydh y les y honan.

Ev a allsa tewlel an prenn er dha bynn

9ha leverel dhis ‘Dha fordh yw da’,

hag ena sevel a-denewen rag gweles an pyth a hwer dhis.

10Na omgusul gans den a vir orthis gans gogrys;

kudh dha gusul dhiworth an re a berth avi ahanas.

11Na omgusul gans benyn a-dro dh'y hesstrivores

po gans kilgi a-dro dhe vresel,

gans marghador a-dro dhe gesvargenya

po gans prener a-dro dhe wertha,

gans kraf a-dro dhe helder

po gans an den didruedh a-dro dhe guvder,

gans an diek a-dro dhe ober vytholl

po gans arvethesik blydhenyek a-dro dhe worfenna y ober,

gans servyas diek a-dro dhe ober meur –

na wra vri a gusul vyth a rons.

12Mes fydh yn kynsa yn gour duwel

a aswonnydh avel onan a with an gorhemmynnow,

ha'y vrys haval dhe'th vrys jy,

ha neb a dhuwenha mar trebuchydh.

13Ha gas dhe gusul dha golonn dha honan sevel,

rag nyns eus denvyth moy lel dhis agessi.

14Rag brys gour treweythyow a yll avisya

gwell ages seyth goelyador esedhys war dour ughel.

15Mes dres oll pys dhe'n Ughella

may kevarwoettho dha fordh yn gwiryonedh.

Gwir Furneth ha Fals Furneth

16Dadhel yw dalleth pub ober,

ha kusul a dheu a-rag pub gweythres.

17Yma gwreydhyow dewis y'n brys.

18Peder furv a denkys a skyll:

da ha drog, bewnans ha mernans;

ha pup-prys yth yw an taves a's rewl.

19Yma gour neb yw konnyk lowr dhe dhyski lies,

ha hwath bos euver dhodho y honan.

20Kowser sleygh a yll bos kesys;

ev a vydh gesys heb boes vytholl.

21Rag ny veu gras res dhodho gans an Arloedh,

drefenn y fyll dhodho pub furneth.

22Yma den a yll dyghtya y negysyow y honan,

frut y gonvedhes a vydh gormelys.

23Gour fur a dhysk y bobel y honan

ha frut y gonvedhes yw len.

24Gour fur a vydh lenwys a vennath,

ha peub a'n gwel a'n gelow gwynn y vys.

25Dydhyow bewnans gour yw niverys,

mes dydhyow Ysrael yw heb niver.

26Den fur a erit fydhyans yn mysk y bobel,

ha'y hanow a vew bys vykken.

Klorder

27Ow mab, prov dha enev y'th vewnans;

ha gwel pyth yw drog ragos, ha na omre dhodho.

28Rag nyns yw pup-tra da rag pubonan,

ha ny gyv denvyth plesour yn pup-tra.

29Na vydh hwansek dhe re a voes denteth,

ha na dheber heb lett;

30rag yn re a voes yma kleves,

ha kowlogneth a dreyl dhe hwyja.

31Lies re verwis a gowlogneth,

mes seul a omwith anedhi a ystynn y vewnans.