Medhogyon ha Kleves

1Enor medhek rag y wonisyow,

rag an Arloedh a'n formyas;

2rag yaghheans a dheu a'n Ughella,

hag ev a dhegemmer gober dhiworth an myghtern.

3Sleyghneth an medhek a dhrehav y benn,

hag enorys vydh yn golok an vrasyon.

4An Arloedh a formyas medhegnethow yn-mes a'n dor,

ha ny wra gour doeth aga dispresya.

5A ny veu dowr gwrys hweg gans prenn

rag may fe godhvedhys y nerth?

6Ev a ros sleyghneth dhe dus

may fe gormelys yn y oberow marthys.

7Dredha an medhek a yaghha ha kemmeres poen dhe-ves;

8an kymyst a wra kemmysk anedha.

Ny vydh oberow Duw nevra gorfennys;

hag anodho kres a les dres enep an nor.

9Ow mab, y'th wannegredh, na strech,

mes pys dhe'n Arloedh, hag ev a'th yaghha.

10Omdenn a gammweyth ha gwra dhe'th diwleuv bos ewn,

ha glanha dha golonn a bub pegh.

11Doro offrynn hweg y sawer, hag offrynn kovadh a vleus fin,

dinew oyl war dha offrynn, kemmys dell ylli.

12Ena ro tyller dhe'n medhek, rag an Arloedh a'n formyas;

na'n gas dhe vos ahanas, rag edhomm a'th eus anodho.

13Termyn a yll dos pan vydh sewena yn aga diwleuv,

14rag i ynwedh a bys dhe'n Arloedh

may hwrontyo dhedha sewena yn dissernya klevesow38:14 dissernya klevesow: Ow siwya an Ebrow.

hag yn yaghheans rag gwitha bewnans.

15Neb a begh a-rag y Wrier,

a omdhiskwedh gorth a-rag medhek.38:15 a omdhiskwedh gorth a-rag medhek: Ow siwya an Ebrow.

Kynvann Rag an Re Varow

16Ow mab, gas dha dhagrow dhe goedha rag den marow,

ha dalleth an alargan kepar hag onan yn poen meur.

Pareus an korf gans solempnita gwiw,

ha na bydh logh y'n ynkleudhyans.

17Bedhes hwerow dha gynvann ha ter dha oelva;

bedhes dha alar gwiw dell dervynn,

rag unn jydh, po dew, rag goheles breus;

ena bydh konfortys rag dha anken.

18Rag galar a yll ledya dhe vernans,

ha kolonn drist a wra dhe nerth koedha.

19Wosa ynkleudhyans galar a dremen;

bewnans a dristyns yw galar dhe'n golonn.38:19 Styr an wers ma yw pur ankler.

20Na ro dha golonn dhe alar;

gorr e dhe-ves, ha porth kov a'th tiwedh.

21Na ankov, nyns eus dehweles;

ny wredh da dhe'n den marow, ty a bystik dha honan.

22Porth kov a'y denkys, rag dha denkys dha honan a vydh yndella;

de dhodho ev,38:22 dhodho ev: Ow siwya an Ebrow. Greka dhymmo vy. ha hedhyw dhiso jy.

23Pan vydh an den marow yn powesva, gas y govadh dhe bowes ynwedh,

ha bydh konfortys ragdho pan vydh diberthys y spyrys.

Kenwerth ha Kreft

24Furneth skriba a dheu dre dermyn syger;

ha neb a'n jeves boghes negys a yll mos ha bos fur.

25Fatell yll mos ha bos fur neb a syns an arader,

ha neb yw balgh a sheft an bros,

neb a lew an oghen hag yw bysi gans aga gweyth,

ha'y gows a-dro dhe lodhnow?

26Ev a re y vrys dhe wul fynnglow,

hag ev yw heb kosk ow ri boes dhe'n lejegow.

27Yndella yth yw pub krefter ha pennser

neb a lavur nos ha dydh;

an re a dregh toknys an selyow,

peub yw diwysyk ow kul diverseth veur;

ev a sett y golonn dhe liwa gwir semlans,

ow korfenna y ober gans rach.

28Yndella an gov, esedhys ryb an anwan,

ow prederi a-dro dhe'n horn a vynn y weytha;

anall an tan a deudh y gig,

hag ev a striv gans gwres an fornes;

tros an morthol a vodharha y dhiwskovarn,

hag yma y dhewlagas war batron an dra a wra.

Ev a sett y golonn war worfenna y ober,

hag ev a gowlwra y afinans gans rach.

29Ynwedh an priweythor esedhys orth y ober

ow treylya an ros gans y dreys;

pup-prys prederys yw a-dro dh'y ober,

owth assaya kowlwul sommenn y lestri.

30Ev a furv an pri gans y vregh

ha'y wul gwedhyn gans y dreys;

ev a sett y golonn war worfenna an gwedrans,

diwysyk yw ow korra tan y'n forn.

31Oll an re ma a fydh yn aga diwleuv,

ha pubonan yw sleygh yn y ober y honan.

32Hebdha ny yll sita bos annedhys,

ha ny yll tus naneyl triga ena na dos dhedhi.

33Hwath nyns yns hwilys rag konsel an bobel,

na esedha yn savla ughel y'n kuntelles.

Ny esedhons war vynk an barner

na ny gonvedhons breus lysyow an lagha;

34ny dhiskwedhons dyskybleth na breus,

ha nyns yns i kevys ow kewsel parabolennow.

Mes i a sosten framweyth an bys,

ha'ga bern yw rag gwrians aga kreft.