Deverow Troha'n Edhommogyon

1Ow flogh, na gemmer pygans an boghosek a-dhiworto,

ha na wra dhe lagasow edhommek gortos.

2Na wra grev dhe enev nownek,

ha na sorr gour yn y ahwer.

3Na geworr moy dhe droblow kolonn serrys,

ha na dhelat dha ro dhe'n edhommek.

4Na dhenagh pysador yn ahwer,

ha na dreyl dha fas dhiworth an boghosek.

5Na dreyl dha lagas dhiworth an den edhommek,

ha na ro dhe dhenvyth skila rag dha vollethi;

6rag mar kwra ev dha mollethi yn hwerowder y enev,

y Greador a glew y bysadow.

7Gwra dhiso bos kerys y'n kuntelles;

ynklin dha benn dhe dhen meur.

8Treyl dha skovarn war-tu ha'n boghosek,

ha gorthybi dhodho gansgeryow kres ha gans klorder.

9Delirv ev neb yw tebeldhyghtys dhiworth leuv an tebeldhyghtyer;

ha na vydh gwann dha spyrys ha ty ow ri breus.

10Bydh avel tas dhe omdhivasow,

hag yn le gour dh'aga mamm;

ena ty a vydh kepar ha mab a'n Ughella,

hag ev a'th kar moy es dell wra dha vamm.

Gobrow Furneth

11Furneth a ughelha hy mebyon,

ha ri gweres dhe'n re a's hwila.

12Piwpynag a's karro, ev a gar bewnans,

ha seul a's hwila myttin a-varr a vydh lenwys a joy.

13Piwpynag a's synso fast a erit glori,

ha'n Arloedh a vennik an tyller mayth enter hi ynno.

14Seul a's serv, a venyster dhe'n Sans;

an Arloedh a gar an re a wra hy hara.

15Neb yw gostydh dhedhi a vreus an kenedhlow,

ha neb a wra vri anedhi a drig yn sawder.

16Mara'n jeves fydhyans ynni, ev a's erit;

ha'y henedh a vydh orth hy fewa.

17Y'n dalleth hi a gerdh ganso war fordhow gwius,

hi a dhre own ha kilgieth warnodho,

ha hi a'n torment dre hy dyskybleth

bys pan allo hi trestya y enev,

ha hi a'n prev dre hy ordenansow.

18Ena, hi a dheu poran dhodho arta ha'y lowenhe,

ha diskwedhes hy hevrinyow dhodho.

19Mars a ev yn sowdhan, hi a'n forsak,

ha'y dhaskorr dh'y derroes.

20Hwither an prys ewn, ha bydh war a dhrog;

ha na dhro bismer warnas dha honan.

21Rag yma bismer a dhre peghes,

hag yma bismer yw glori ha gras.

22Na dhiskwa ragvreus dhe'th pystik dha honan,

na revrons, dhe'th terroes.

23Na omwith dhiworth kewsel pan vydh edhomm,

ha na gudh dha furneth.

24Rag furneth yw aswonnys dre lavar,

ha dyskans dre eryow an taves.

25Nevra na gows erbynn an gwir,

mes gwra vri a'th diskians.

26Na vydh methek a avowa dha beghosow,

ha na hwila striv erbynn fros avon.

27Na vydh sojet dhe foll,

na diskwedhes ragvreus a-barth rewler.

28Striv bys yn ankow rag an gwiryonedh,

ha'n Arloedh Duw a omladh ragos.

29Na vydh dibreder y'th lavar,

na syger na logh y'th wriansow.

30Na vydh kepar ha lew yn dha ji,

na lordya war dha wesyon.

31Na vedhes dha leuv ystynnys dhe gemmeres,

mes kildennys orth attyli.