Anfeus Den

1Ober kales a veu kreatys rag pub den,

hag yma yew boes war vebyon Adam,

a-dhia'n jydh may tons yn-mes a dorr aga mamm

bys y'n jydh pan dhehwelons dhe vamm pup-tra.

2Yma dhedha tybyansow troblys hag own a'n golonn,

ha fienasow prederus a dhydh aga mernans.

3A'n den esedhys war y dron splann

dhe'n den uvelhes yn doust ha lusu,

4a'n den a wisk purpur ha kurun

dhe'n den yw gwiskys yn saghlenn,

5yma sorr hag avi ha poenvos hag ankres,

hag own mernans, ha konnar ha strif.

Hag yn termyn powes war y weli,

y gosk yn nos a janj y vrys.

6Boghes po travyth yw y bowes;

ev a lavur yn y gosk kepar hag y'n jydh.

Troblys yw gans gwelesigeth y vrys

kepar hag onan re dhienkas a'n gaslann.

7Pan vo pup-tra saw ev a dhifun,

ha marth ganso bos an own travyth.

8Dhe bub kreatur, den hag enyval,

mes dhe beghadoryon seythgweyth moy,

9y teu mernans ha krow ha strif ha kledha,

terroesow ha divoetter ha diswrians ha skorja.

10Oll an re ma a veu gwrys rag an debeles,

ha ragdha y teuth an liv.

11Yma pup-tra eus dhiworth an dor ow tehweles dhe'n dor

ha'n pyth usi dhiworth an dowrow a dehwel dhe'n mor.40:11 ha'n pyth usi dhiworth an dowrow a dehwel dhe'n mor: Po war-lergh an Ebrow ha'n pyth usi a'n ughelder a dhehwel dhe'n ughelder.

Ny Sewen Kammhynseth

12Pub falswobrans ha kammhynseth a vydh dileys,

mes fydhyans da a dhur bys vykken.

13Golusogneth an re gammhynsek a vydh desyghys avel avon,

hag avel taran meur a dremen yn skon wosa kowas glaw.

14Den hel a lowenha pan iger y leuv,

yndellma treuspassoryon a fyll yn tien.

15Ny wra fleghes an re dhidhuw gorra lies skorrenn yn-rag;

gwreydh anyagh yns war garrek serth.

16An kors ryb pub dowr po glann avon

yw diwreydhys kyns gwels vyth;

17Kuvder yw avel lowarth a vennathow,

hag alusen a dhur bys vykken.

Lowender Bewnans

18Bewnans yw hweg rag an den a ober ragdho y honan, ha rag an arvethesik,

mes gwell es an eyl po y gila yw trovya tresor.

19Fleghes ha drehevel sita a surha hanow den,

mes gwell es an eyl po y gila yw kavoes furneth.

Gwarthek ha dor plynsys a wra dhe dhen sewena;

mes gwreg dhivlam yw reknys gwell ages an eyl po y gila.40:19 mes gwreg dhivlam yw reknys gwell ages an eyl po y gila: Ow siwya an Ebrow. Nyns usi an geryow ma y'n Greka.

20Gwin ha menestrouthi a lowenha an golonn,

mes kerensa furneth yw gwell ages an eyl po y gila.

21An bib ha'n delynn a wra ton hweg

mes lev plegadow yw gwell ages an eyl po y gila.

22An lagas a dhesir gras ha tekter,

mes egin glas an ys yw gwell es an eyl po y gila.

23Da pup-prys yw metya gans koweth po keskoweth,

mes gwreg gans hy gour yw gwell ages an eyl po y gila.

24Breder ha gweresoryon yw skoedh yn termyn trobel,

mes alusen a dhelirv gwell ages an eyl po y gila.

25Owr hag arghans a wra dhe'n troes sevel fyrv,

mes kusul dha yw synsys moy ages an eyl po y gila.

26Rychys ha nerth a dhrehav an golonn

mes own an Arloedh yw gwell ages an eyl po y gila.

Nyns eus difyk yn own an Arloedh,

ha ganso nyns eus edhomm a hwilas gweres.

27Own an Arloedh yw avel lowarth a vennath,

hag a gudh den gwell ages golewder vytholl.

Bewnans Beggyer

28Ow mab, na siw bewnans beggyer;

gwell yw merwel ages beggya.

29Pan virir orth moes ken den,

ny yll fordh y vewnans bos synsys bewnans.

Ev a dhefol y spyrys gans boesow ken den,

mes gour poellek ha dyskys yn ta a omwith erbynn henna.

30Yn ganow an den diveth beggya yw hweg,

mes yn y dorr tan a lesk.