Marwoleth

1A vernans, ass yw hwerow an kov ahanas

dhe dhen yw attes yn mysk y bythow,

dhe wour yw rydh a dhistennansow, ha sewen yn pup-tra,

ha hwath bewek lowr dhe lowenhe yn y voes!

2A vernans, ass yw teg dha varn

dhe dhen yw edhommek ha'y nerth ow fyllel,

skwithhes gans henys ha prederus a-dro dhe bup-tra;

neb yw gorth, ha re gollas perthyans oll!

3Na own breus mernans ragos;

porth kov a'n re res eth a-ragos ha'n re a dheu a-wosa.

4Hemm yw breus an Arloedh rag oll kig;

prag y neghydh ytho bodh an Ughella?

Deg blydhen, po kans, po mil,

ny vydh govynnys travyth yn ifarn a-dro dhe hirder bewnans.

Tenkys an Re Dhidhuw

5Fleghes beghadoryon yw fleghes kasadow,

ha trigys esons yn trigvaow an re dhidhuw.

6Eretons fleghes beghadoryon a verow,

ha war aga agh y fydh meth ow pesya.

7Fleghes a vlam tas didhuw

rag i dhe wodhevel meth a'y wovis.

8Go-hwi, hwi wer dhidhuw,

re eskasas lagha Duw Ughella!

9Pan owgh hwi dineythys, dineythys owgh dhe volleth;

ha pan verwowgh, molleth yw agas rann.

10Pypynag a dheu a'n dor a dhehwel dhe'n dor;

yndella yth a an re dhidhuw a-dhiworth molleth dhe dhistruyans.

11Tus a gyn rag mernans an korf

mes drokhanow peghadoryon a vydh dileys.

12Gwra vri a'th hanow, drefenn henna dhe besya war dha lergh

hirra ages milyow a dresoryow meur a owr.

13Dydhyow bewnans da yw niverys,

mes hanow da a dhur bys vykken.

14Ow fleghes, bedhewgh lel dh'agas dyskans ha bedhewgh attes;

furneth kudhys ha tresor anwelys –

pana les eus ynna aga dew?

Traow Methus

15Gwell yw an den a gudh y follneth

ages an den a gudh y furneth.

16Rakhenna gwrewgh vri a'm lavarow;

rag nyns yw da omglewes methus yn pub treveth,

na nyns yw pup-tra kommendys gans peub.

17Bedhewgh methek a bub anvaseth reydhel a-rag tas po mamm;

hag a wowegneth a-rag pennsevik po rewler;

18a alweyth a-rag barner po justis;

hag a dorrva an lagha, a-rag an kuntelles ha'n bobel;

a dreuspass a-rag kespar po koweth;

19hag a ladrynsi y'n tyller mayth esos trigys.

Bydh methek a derri ambos,

hag a boesa war dha dhewelin yn prys-boes;

a dheskernuster ow tegemmeres po ow ri,

20hag a skonya aswonn tus a'th salus;

a vires orth benyn yw hora,

21hag a nagha galow neskar;

a gemmeres dhe-ves rann po ro nebonan,

hag a lagatta orth gwreg ken gour;

22a vellya gans y servyades,

po mos ogas dh'y gweli;

a eryow divlas, a-rag kowetha –

ha na vydh arvedhus wosa gul ro.

23Bydh methek a dhasleverel an pyth a glewydh,

hag a dhiskevra kevrinyow.

Ena ty a dhiskwa gwir veth,

ha kavoes favour gans pubonan.