1Mes a'n traow ma na gemmer meth,

ha na begh dhe blesya re erell:

2Na gemmer meth a lagha an Ughella ha'y gevambos,

nag a ri barn dhe akwitya an re dhidhuw;

3a witha akontow gans kespar po kesvyajyoryon;

po a ranna eretons kowetha;

4a gewerder gans mantolyow ha poesow,

po a gavoes meur po boghes;

5a vudh ow pargenya gans marghadoryon,

hag a dhyskybla fleghes yn fenowgh,

hag a denna goes dhiworth keyn drog servyas.

6Le may ma gwreg dhislel, sel yw tra dha;

ha le may ma lies leuv, alhwedh traow.

7Pan redh neppyth dhe nebonan rag y witha saw, gwayt y vos komptys ha poesys,

ha pan redh po degemmeres, gwra kovnotenn a bup-tra yn skrif.

8Na gemmer meth ow tyski den gokki po foll

po den pur goth yw kablus a anvaseth reydhel.

Yndella ty a vydh dyskys yn hwir,

ha ty a vydh kommendys gans pub den oll.

Tasow ha Myrgh

9Myrgh yw acheson difunedh kevrinek dh'y thas,

ha preder a-dro dhedhi a gemmer kosk dhe-ves;

pan yw hi yowynk, rag own na dhemmettho,

po wosa bos demmedhys, rag own hy bos ankerys;

10pan o gwyrgh, rag own hy bos defolys

ha dos ha bos beghyek yn chi hy thas;

ha wosa kavoes gour, rag own hy bos dislel,

po, kynth yw hi demmedhys, rag own hy bos anvap.

11Gwith yn stroeth war vyrgh worth,

ma na vi skorn dhe'th eskerens,

testenn a geskows y'n sita ha kuntelles an bobel,

ha'th worra dhe veth a-rag lies.42:11 Yma omma y'n Ebrow an geryow Gwel nag eus lattis yn hy stevell, na tyller may hyll hi mires orth entrans an chi.

12Na as hi dhe dhiskwedhes hy thekter a-rag gour vyth,

na dhe esedha ow kyhwedhla yn mysk gwragedh;

13rag a dhillas y teu goedhan,

hag a wreg sherewynsi gwreg.

14Gwell yw drogedh gour ages benyn a wra dader;

benyn yth yw a dhre meth ha diras.

Gweythresow Duw yn Natur

15My a berth kov lemmyn a weythresow an Arloedh,

ha disklerya an pyth a welis.

Gans geryow an Arloedh y weythresow a veu gwrys;

hag oll y greasyon a wra y vodh.42:15 hag oll y greasyon a wra y vodh: Nyns usi an geryow ma y'n Greka. Selys yns war an Syriek.

16An howl a vir war-nans war bup-tra gans y wolow,

hag ober an Arloedh yw leun a'y wolewder.

17Ny alloesegis an Arloedh y syns

dhe dherivas oll y weythresow barthusek,

a fastyas an Arloedh Ollgalloesek

may saffo an ollvys fyrv yn y wolewder.

18Ev a hwither an islonk ha kolonn den;

ev a gonvedh aga hevrinyow downa.

Rag an Ughella a woer pup-tra a yll bos godhvedhys;

ev a wel toknys an oes.

19Ev a dhisklos an pyth re beu ha'n pyth a vydh,

hag ev a dhiskudh olow traow kel.

20Ny dhiank preder vyth a-dhiworto,

ha nyns eus travyth kelys a-dhiworto.

21Ev re ordenas splannderyow y furneth;

ev a bes an keth, trank heb worfenn ha bys vykken.

Nyns eus travyth a yll bos keworrys po tennys dhe-ves,

ha ny'n jeves edhomm a gusulyador.

22Ass yw desiradow y weythresow oll,

bys y'n lyha gwryghonenn a yll bos gwelys!

23Oll an traow ma a vew ha pesya bys vykken;

pup-tra yw gostydh rag pub edhomm.

24Pup-tra a dheu yn koplow, an eyl gorthparth y gila,

ha ny wrug ev travyth yn anperfydh.

25An eyl a fast vertu y gila.

Piw a yll kavoes lowr ow mires orth y wolewder?