Splannder an Howl

1Ass yw splann fyrmament kler an ebron,

ass yw gloryus golok an nevow!

2An howl, pan omdhiskwa, a dhiskler, hag ev ow sevel,

ass yw marthys oberow an Ughella43:2 ass yw marthys oberow an Ughella: Ow siwya an tekst ebrow..

3Dhe hanter-dydh ev a sygh an tir,

ha piw a yll perthi y doemmder?

4Den ow hwytha fornes a ober yn gwres a lesk,

mes teyrgweyth poettha yw an howl a lesk an menydhyow;

ev a hwyth yn-mes ethennow tanek,

ha'y dhewynnow splann a dhall an lagasow.

5Meur yw an Arloedh a'n gwrug;

orth y worhemmynn ev a fisten war y hyns.

Splannder an Loer

6Ev a wrug an loer ynwedh dhe servya y borpos43:6 An linenn ma yw ankler y'n Greka ha'n Ebrow aga dew.

tokyn bythkwethek ow merkya an prysyow.

7A'n loer y teu tokyn dydhyow goel,

golow a wannha pan worfenn hy hyns.

8An mis yw henwys war-lergh an loer;

hi a voghha marthys yn hy threylva,

golowva dhe'n luyow y'n ughelder,

ow splanna yn fyrmament an nevow!

Golewder an Ster ha'n Gammneves

9Golewder an ster yw tekter nev,

aray ow terlentri yn ughelder an Arloedh.

10Orth gorhemmynn an Sans i a sev yn aga thylleryow ordenys;

heb difygya yn aga goelyow.

11Mirewgh orth an gammneves, ha gormel ev neb a's gwrug;

fest teg yw yn hy splannder.

12Hi a gylgh an ebron gans hy gwarak gloryus;

diwleuv an Ughella re's ystynnas.

Revedhow Natur

13Orth y worhemmynn ev a wra an ergh dhe fyski

ha dannvon uskis lughes y vreus.

14Yndellma an gwithvaow yw igerys,

ha'n kommol a nij yn-mes avel ydhyn.

15Yn y veuredh ev a re dhe'n kommol aga nerth,

ha'n keser yw terrys dhe demmyn.

16Lev y daran a geredh an nor;43:16 Lev y daran a geredh an nor: Ow siwya an Ebrow; nyns usi an geryow ma y'n Greka.

pan omdhiskwa, an menydhyow a gren;

orth y vodh gwyns an dyghow a hwyth,

keffrys ha tewedh an gogledh ha'n korwyns.

17Ev a skatter an ergh avel ydhyn ow nija,

ow tiyskynna avel lokustes.

18Marth bras a'n jeves an lagas orth tekter y wynnder,

ha'n brys a'n jeves marth pan goedh.

19Ev a dhiver rew war an nor avel hoelan,

ha kleghi yey yw furvys avel dreyn minyek.

20Gwyns oer an gogledh a hwyth

ha yey yw fastys war an dowr;

y teu war bub poll dowr

ha'n dowr a'n gwisk avel lurik.

21Ev a dhevor an menydhyow ha leski an gwylvos,

ha gul dhe'n gwels krina kepar ha gans tan.

22Niwl yn uskis a yaghha pup-tra;

ha'n gluth a dhiyskynn ha difres wosa an gwres.

23Der y gusul ev a goselhas an downder

ha plansa ynysow ynno.

24An re a woel an mor a gews a'y beryllow,

ha marth a'gan beus a'n pyth a glewyn.

25Rag ynno yma kroaduryon ankoth ha barthusek,

pub eghenn a daklow bew ha morviles.

26Dredho pub kannas a gyv y fordh,

ha der y er pup-tra yw synsys war-barth.

27Ni a yll leverel moy mes heb leverel lowr;

bedhes an diwettha ger: ‘Ev yw an oll.’

28Ple hyllyn kavoes an nerth dh'y wormola?

Rag ev yw brassa ages oll y weythresow.

29Euthyk yw an Arloedh ha fest meur,

ha barthusek yw y alloes.

30Pan wormelowgh an Arloedh gwra y ughelhe kemmys dell yllowgh,

rag ev a worbass hwath henna.

Pan y'n ughelhewgh, rewgh oll agas nerth,

ha na vedhewgh skwith, rag ny yllowgh y wormel lowr.

31Piw re'n gwelas hag a yll y dheskrifa?

Ha piw a yll y veurhe dell yw?

32Meur a daklow brassa ages an re ma yw kudhys,

rag ni re welas marnas boghes a'y weythresow.

33Rag an Arloedh re wrug pup-tra,

ha dhe'n re dhuwek ev re ros furneth.