Enor dh'agan Hendasow

1Gormelyn lemmyn gwer a vri,

agan tasow yn aga henedhow.

2An Arloedh a gevrennas dhedha golewder meur,

y veuredh a'n dalleth.

3Yth esa re a rewlyas yn aga ruvanethow,

gwer aswonnys drefenn aga galloes;

ow ri kusul der aga gonvedhes;

ow kewsel yn profoesansow;

4hembrenkysi an bobel der aga husulyow

ha der aga honvedhes a hengovyow an bobel;

ow leverel geryow fur a dhyskans.

5Re a hwilas melodiow,

po displetya gwersow yn skrif;

6gwer rych ha galloesek,

trigys yn kres yn aga threvow –

7oll an re ma a veu enorys yn aga henedhow,

hag a veu bost aga dydhyow.

8Yma re anedha a asas hanow war aga lergh,

may fo derivys aga gormel.

9Hag yma re erell ma nag eus kov anedha;

i eth dhe goll par dell na viens bew;

i re dheuth ha bos par dell na viens genys,

ha keffrys aga fleghes war aga lergh.

10Mes an re ma o gwer dregeredhus,

ha ny veu ankevys aga gweythresow gwiryon;

11aga hanow da re dremenas dh'aga has,

ha'ga eretons dh'aga diyskynnysi.44:11 Amendys. Styr an Greka yw ankler.

12Aga has a sev a-ji dhe'n kevambosow;

aga fleghes i ynwedh, a-barth dhedha.

13Aga has a dhur bys vykken,

ha ny vydh dileys aga golewder.

14Aga horfow yw ynkleudhys yn kres,

mes aga hanow a vew henedh wosa henedh.

15Poblow a dheriv aga furneth,

ha'n kuntelles a dheklar aga gormel.

Enok

16Enok a blesyas an Arloedh hag a veu kemmerys yn-bann,

patron a edrega dhe bub henedh.

Noy

17Noy a veu kevys dhe vos perfydh ha gwiryon;

yn termyn sorr ev a veu kemmerys yn keschanj;

ytho remenant a veu gesys war an bys

pan dheuth an liv.

18Kevambosow bythkwethek a veu gwrys ganso

ma na vo pub kig nevra dileys gans liv.

Abraham

19Abraham o tas meur a lies kenedhel,

ha ny veu kevys par dhodho yn glori.

20Ev a withas lagha an Ughella

ha dos yn kevambos ganso;

ev a selyas an kevambos yn y gig,

ha pan veu prevys ev a veu kevys lel.

21Ytho an Arloedh a fastyas dhodho gans ti

an kenedhlow dhe vos bennigys der y has;

hag ev dh'aga lieshe avel doust an nor,

hag ughelhe y has avel an ster,

ha ri dhedha eretons a vor dhe vor

a'n avon dhe bennow an nor.

Ysak ha Yakob

22Ev a'n fastyas dhe Ysak ynwedh

a-barth y das Abraham.

Bennath tus oll ha'n kevambos

23ev a wrug dhe bowes war benn Yakob;

ev a'n aswonnis gans y vennathow,

ha ri dhodho y eretons;

ev a erviras y rannow,

ha'ga lesranna yn mysk an dewdhek loeth.