Moyses

1Anodho an Arloedh a dhros yn-rag gour tregeredhus

a gavas favour yn golok pub kig,

kerys gans Duw ha tus,

Moyses, mayth o y gov benniges.

2Ev a'n gwrug par yn golewder dhe'n re sans,

ha'y wul meur, dhe euth y eskerens.

3Der y eryow ev a wrug dhe doknys fyski;45:3 fyski: Ow siwya an Ebrow. Greka hedhi.

an Arloedh a'n glorifias yn golok myghternedh.

Ev a ros gorhemmynnow dhodho rag y bobel,

ha diskudha dhodho rann a'y wolewder.

4Rag y lelder ha'y glorder ev a'n sakras,

orth y dhewis yn-mes a gig oll.

5Ev a wrug dhodho klewes y lev,

ha'y hembronk a-ji dhe'n tewlder,

ha ri dhodho an gorhemmynnow fas orth fas,

lagha bewnans hag godhvos,

may tysko an kevambos dhe Yakob,

ha'y varnow dhe Ysrael.

Aron

6Ev a ughelhas Aron, gour sans haval dhodho

neb o y vroder a loeth Levi.

7Ev a wrug kevambos bythkwethek ganso,

ha ri dhodho oferyaseth an bobel.

Ev a'n bennigas gans gwiskas bryntin

ha gorra goen gloryus warnodho.

8Ev a'n gwiskas yn splannder perfydh

ha'y grevhe gans toknys awtorita,

an lavrek, an pows ow trehedhes bys y'n treys, ha'n efod.

9Hag ev a'n kylghyas gans greunavalow,

gans lies klogh owrek oll a-dro

rag dannvon son dell gerdhi,

may fo aga son klewys y'n tempel

avel kov dhe vebyon y bobel;

10gans gwisk sans, a owr ha glasrudh

ha purpur, gweyth brosyer;

an lurik45:10 an lurik: Ow siwya an Ebrow. Greka an dhargan. a varn, gans an toknys a wirder;

11gans rudhgogh plethys, gweyth krefter;

gans meyn drudh grevys avel selyow,

settys yn owr, gweyth gemmweythor,

dhe govhe yn lytherennow grevys,

herwydh niver loethow Ysrael;

12gans kurun owrek war y dulyfant

ha grevys, kepar ha sel, gans ‘Sansoleth’,

tegenn a enor, gweyth krefter konnyk,

delit dhe'n lagas, afinys yn teg.

13Kyns y dermyn nyns esa traow teg a'n par ma.

Ny's gwiskas estren bythkweth,

saw unnsel y vebyon

ha'y dhiyskynnysi heb hedhi.

14Y sakrifisow a vydh kowlleskys

diwweyth pub dydh heb lett.

15Moyses a'n sakras,

ha'y ura gans oyl sans;

y feu kevambos bythkwethek ragdho

ha rag y dhiyskynnysi dydhyow oll an nev,

dhe venystra dhe'n Arloedh ha servya avel oferyas

ha benniga y bobel yn y hanow.

16Ev a'n dewisas yn-mes a oll an re vew

dhe offrynna sakrifis dhe'n Arloedh,

ynkys ha sawer hweg avel kov

dhe wul prenedh rag an bobel.

17Yn y worhemmynnow ev a ros dhodho

awtorita dhe wul erviransow laghel,

dhe dhyski dhe Yakob an dustuniow

ha golowi Ysrael yn y lagha.

18Estrenyon a vrasas er y bynn,

ha perthi avi orto y'n gwylvos,

an wer a-dro dhe Dathan hag Abiram

ha kuntelles Koragh, yn sorr ha konnar.

19An Arloedh a'n gwelas ha displesys o,

hag yn poethter y sorr distruys vons;

ev a wrug marthusyon er aga fynn

dh'aga howlleski yn flamm tanek.

20Ev a geworras golewder dhe Aron

ha ri dhodho eretons;

ev a gevrennas dhodho an offrynnow sans,

gans bara an wolok avel y rann.45:20: Amendys.

21Rag i a dheber sakrifisow an Arloedh

a ros ev dhodho ha dh'y dhiyskynnysi.

22Mes yn tir an bobel ny'n jeves eretons,

ha ny'n jeves rann yn mysk an bobel;

rag an Arloedh y honan yw y rann ha'y eretons.

Finehas

23Finehas mab Eleazar yw an tressa yn golewder

rag bos diwysyk yn own an Arloedh,

hag ev a sevis fast pan dreylyas an bobel dhe-ves,

yn kolonnekter bryntin y enev;

hag ev a wrug prenedh rag Ysrael.

24Ytho kevambos a gres a veu gwrys ganso,

may fo hembrenkyas an sentri ha'y bobel,

ha ma's teffo hag ev ha'y dhiyskynnysi

dynita an oferyaseth bys vykken.

25Par dell veu selys kevambos gans Davydh

mab Yesse a loeth Yuda,

ma na dremen eretons an myghtern saw unnsel a vab dhe vab,

yndellma eretons Aron yw rag y dhiyskynnysi.

26Ha lemmyn bennigewgh an Arloedh, neb yw da,

neb re'gas kurunas gans golewder. 45:26 Ha lemmyn bennigewgh an Arloedh, neb yw da, neb re'gas kurunas gans golewder: Yma an geryow ma y'n Ebrow.

Re wrontyo an Arloedh dhywgh furneth y'n golonn

dhe varna y bobel gans gwirvreus,

ma na vo kellys aga sewena,

ha may pessyo aga golewder der aga henedhow oll.