Yoshua ha Kaleb

1Yoshua mab Nun o galloesek yn bresel,

ow siwya Moyses y'n soedh brofoesek.

Ev a dheuth ha bos, herwydh styr y hanow,

selwador meur a'n re dhewisys gans Duw,

dhe dyli dial war an eskerens a sevis er aga fynn,

may rollo dhe Ysrael y eretons.

2Ass o gloryus pan dhrehevis y dhiwleuv

hag ystynn y gledha erbynn an sitys!

3Piw kyns es ev a sevis mar fast?

Rag ev a woestlas bel an Arloedh.

4A nyns o dredho may hedhis an howl

hag unn jydh a dheuth ha bos mar hir ages dew?

5Ev a elwis war an Ughella, an Galloesek,

pan waskas eskerens warnodho a bub tu,

ha'n Arloedh meur a worthybis dhodho

gans keser a veur nerth.

6Ev a fethas an genedhel na yn batel

ha war an leder ev a dhistruis y erbynnoryon,

may hwodhvo an kenedhlow nerth y arvow,

ev dhe omladh yn golok an Arloedh;

rag ev o holyer lel a'n Galloesek.

7Hag yn dydhyow Moyses ev a wrug ober a dregeredh,

ev ha Kaleb mab Yefunne:

i a omsettyas erbynn an kuntelles,

gwitha an bobel rag pegh

ha koselhe aga krodhvol treus.

8Hag yn-mes a hwegh kans mil den war droes,

ny veu nagonan gesys yn few saw unnsel an dhew ma,

dhe hembronk an bobel dh'aga eretons,

an tir a dhinwa leth ha mel.

9An Arloedh a ros krevder dhe Kaleb,

a besyas bos ganso yn y gothni,

mayth yskynnas y'n vro venydhyek,

ha'y dhiyskynnysi a'n kavas rag eretons,

10may hwello fleghes Ysrael oll

fatell yw da holya an Arloedh.

An Vreusysi

11An vreusysi ynwedh, pubonan gans hanow da,

ma na goedhas aga holonn yn gordhyans idolys

ha na dreylsons dhe-ves dhiworth an Arloedh –

re bo benniges aga hov.

12Re dhasvewo aga eskern a'n tyller may mons ynkleudhys,

ha re bo aga hanow enorys

bos treusperthys dh'aga vebyon.

Samuel

13Samuel o kerys gans y Arloedh;

profoes an Arloedh, ev a fondyas myghterneth

hag untya rewloryon war y bobel.

14Herwydh lagha an Arloedh ev a vreusis an kuntelles,

ha'n Arloedh a woelyas war Yakob.

15Der y lelder ev a veu prevys bos profoes

ha der y eryow ev a veu aswonnys avel gwelesydh len.

16Ev a elwis war an Arloedh, an Galloesek,

pan y'n gwaskas y eskerens a bub tu,

hag ev a offrynnas yn sakrifis oen ow tena.

17Ena an Arloedh a darennas a-dhiworth nev,

ha gul y lev dhe vos klewys gans tros meur;

18ev a fethas hembrenkysi tus Tyr

hag oll gwahalyethow an Filistysi.

19Kyns termyn y gosk bythkwethek,

Samuel a dhustunias a-rag an Arloedh ha'y untys:

‘Ny gemmeris gwara denvyth

na hwath eskis.’

Ha denvyth ny'n kuhudhas.

20Hwath wosa ev dhe verwel, ev a brofoesas

ha diskwedhes y vernans dhe'n myghtern,

ha drehevel y lev a'n dor

yn profoesans, dhe dhilea droktra an bobel.