Nathan

1War y lergh Nathan a sevis

dhe brofoesa yn dydhyow Davydh.

Davydh

2Dell yw an blonek kemmerys a'n offrynn kres,

yndellma Davydh a veu dewisys a fleghes Ysrael.

3Ev a waria gans lewyon par dell ens mynnigow,

ha gans orses par dell ens eynigow.

4A ny ladhas ev kowr yn y yowynkneth,

ha kemmeres dhe-ves disenor an bobel,

pan dhrehevis y leuv gans men y'n towlbrenn

ha gweskel Goliath an boster?

5Rag ev a elwis war an Arloedh, an Ughella,

neb a ros nerth dh'y leuv dhyghow

dhe weskel kasor galloesek dhe'n leur,

hag ughelhe nerth y bobel.

6Ytho i a'n enoras rag an degow a vilyow a fethas,

ha'y ganmel rag bennathow an Arloedh,

pan veu res dhodho diadem a wolewder.

7Rag ev a dhistruis y eskerens a bub tu,

ha dri dhe dravyth y erbynnoryon, an Filistysi;

ev a vrewis aga hevoeth bys y'n jydh hedhyw.

8Yn oll y oberow ev a ros gras

dhe'n Sans, an Ughella,

gans geryow golewder;

ev a ganas gormel gans oll y golonn, hag ev a garas y Wrier.

9Ev a worras kanoryon a-rag an alter,

rag gul menestrouthi hweg gans aga lev.

10Ev a ros tekter dhe'n goelyow,

ha restra aga thermyn dres an vlydhen,

may hwormelsons hanow sans Duw,

ha'n sentri a dhassonas a'n myttin a-varr.

11An Arloedh a dhileas y beghosow

hag ughelhe y alloes bys vykken;

ev a ros dhodho kevambos myghternsys

ha tron gloryus yn Ysrael.

Solomon

12War y lergh mab fur a sevis

hag a'y wovis ev o trigys yn sawder:

13Solomon a reynyas yn oes a gres,

drefenn Duw dhe wul kosel oll y oryon,

may treheffo chi yn y hanow

ha pareusi sentri dhe sevel bys vykken.

14Assa veus fur y'th yowynkneth!

Ty a worliva gans konvedhes kepar hag avon.

15Dha dhelanwes a lesas der an nor,

ha ty a'n lenwis gans parabolennow down aga styr.

16Dha hanow a hedhas dhe ynysow pell,

ha ty o kerys drefenn dha reyn hebask.

17Dha ganow, dha henlavarow, dha barabolennow

ha'n gorthybow a resys o revedh dhe'n kenedhlow.

18Yn hanow an Arloedh Duw,

yw gelwys Duw Ysrael,

ty a guntellas owr avel sten

hag arghans avel plomm.

19Mes ty a dhros benynes dhe wrowedha rybos

ha dre dha gorf ty a veu dres yn gostytter.

20Ty a worras namm war dha enor

ha defola linyeth dha deylu,

may tresys sorr war dha fleghes,

ha duwenys ens dre dha follneth,

21drefenn bos rynnys an sovranedh

ha ruvaneth trehwelek a sevis yn-mes a Efraym.

22Mes ny as an Arloedh nevra y dregeredh,

na gasa dh'y oberow mos dhe goll;

ny dhile nevra henedh y dhen dewisys,

na distrui has an den a'n kar.

Ytho ev a ros remenant dhe Yakob,

ha dhe Davydh gwreydhenn yn-mes anodho.

Rehoboam ha Yeroboam

23Solomon a bowesas gans y dasow,

ha gasa war y lergh onan a'y vebyon,

efan yn follneth ha fowt a skians dhodho,

Rehoboam, neb a dreylyas an bobel der y gusul dhe worthsevel.

Ena Yeroboam mab Nebat a ledyas Ysrael dhe begha

ha settya Efraym war an fordh a beghes.

24Aga feghosow a ynkressyas moy ha moy,

bys pan vons divres a'ga thir.

25Rag i a hwilas pub eghenn a dhrogedh,

bys pan dheuth dial warnedha.