Elias

1Ena Elias a sevis, profoes avel tan,

ha'y er a loskas avel faglenn.

2Ev a dhros divoetter warnedha,

ha der y dhiwysykter ev a lehas aga niver.

3Dre er an Arloedh ev a dhegeas an nevow,

hag ynwedh teyrgweyth ev a dhros tan war-nans.

4Ass veus gloryus, Elias, y'th weythresow marthys!

Piw ganso usi an gwir dhe vostya avelos?

5Ty a dhrehevis den marow a vernans

ha dhiworth ifarn, der er an Ughella.

6Ty a dhannvonas myghternedh dhe dhistruyans,

ha gwer a vri, a'ga gweliow kleves.

7Ty a glewas keredh yn Sinay

ha barnow dial yn Horeb.

8Ty a untyas myghternedh dhe dyli dial

ha profoesi dhe holya war dha lergh.

9Ty a veu kemmerys yn-bann gans korwyns a dan,

yn charett gans mergh tanek.

10Y'n termyn ordenys, yth yw skrifys, ty yw destnys

dhe hebaskhe sorr an Arloedh kyns ev dhe dhyllo yn konnar,

dhe dreylya kolonn an tas dh'y vab,

ha dhe dhassevel loethow Yakob.

11Gwynn aga bys an re a'th welas,

hag a goskas y'th kerensa!

Rag ni ynwedh a vew yn sur.

Elisha

12Pan veu Elias maylys y'n korwyns

Elisha a veu lenwys a'y spyrys.

Ev a wrythyas diwweyth kemmys a doknys,

ha marthusyon gans pub lavar a'y anow.48:12 Ev a wrythyas diwweyth kemmys a doknys, ha marthusyon gans pub lavar a'y anow: Nyns usi an geryow ma y'n tekst greka, ymons yn tekst ebrow.

Bythkweth yn y vewnans ny grenas a-rag pennsevik vyth,

na ny ylli denvyth y ownekhe.

13Nyns esa travyth re gales ragdho,

ha wosa y vernans, y gorf a brofoesas.

14Yn y vewnans ev a wrug marthusyon,

hag yn mernans y weythresow o barthusek.

15Yn despit dhe oll hemma nyns o edregus an bobel,

na ny eskassons aga feghosow,

bys pan vons degys dhe-ves avel preydh a'ga thir,

hag a veu skattrys der oll an nor.

An bobel o gesys boghes aga niver

mes gans rewler a ji Davydh.

16Re anedha a wrug an pyth o plegadow,

mes re erell a beghas moy ha moy.

Hezekia

17Hezekia a geras y sita,

ha dri dowr a-ji ynni;

ev a balas der an garrek gans toulow a horn,

ha drehevel dowrarghow.

18Yn y dermyn Sennagherib a dheuth yn-bann;

ev a dhannvonas an Rabshake hag omdenna;

ev a dhrehevis y dhorn erbynn Sion,

ha bostya meur yn y valghder.

19Ena aga holonnow ha'ga diwleuv a grenas,

hag yth esens yn angoes, avel gwragedh yn gwelivesi.

20Mes i a elwis war an Arloedh tregeredhus,

owth ystynn aga diwleuv war-tu hag ev.

An Sans a's klewas distowgh dhiworth nev,

ha'ga livra dre leuv Ysay.

21Ev a weskis kamp an Assyrianys,

ha'y el a's distruis.

22Rag Hezekia a wrug an pyth o plegadow dhe'n Arloedh,

hag omwitha krev dhe fordhow y hendas Davydh,

dell veu gorhemmynnys gans an profoes Ysay

neb o meur ha lel yn y welesigethow.

Ysay

23Yn dydhyow Ysay an howl eth war dhe lergh,

hag ev a ystynnas bewnans an myghtern.

24Der y spyrys krev ev a welas an pyth a dho,

ha konfortya an gynoryon yn Sion.

25Ev a dhiskwedhas an pyth a dho bys yn diwedh termyn,

ha'n traow kudhys kyns i dhe hwarvos.