Gwarnyans a-dro dhe Bedhekter

1Na ro dha vrys war dha rychys,

na leverel, ‘Yma lowr dhymm.’

2Na hol dha vodh na dha nerth,

ow kerdhes herwydh hwansow dha golonn.

3Na lever, ‘Piw a'n jevydh galloes dresov?’

rag yn sur an Arloedh a'th kessydh.

4Na lever, ‘My a beghas, ha pandr'a hwarva dhymm?’

rag an Arloedh yw lent dhe serri.

5Na vydh mar sur a brenedh

may keworrydh peghes dhe beghes.

6Na lever, ‘Meur yw y versi,

ev a av dhymm ow feghosow pals’,

rag yma mersi ha sorr ganso,

ha'y sorr a boes war beghadoryon.

7Na dhelat treylya dhe'n Arloedh,

na hokya a dhydh dhe dhydh;

rag a-dhesempis sorr an Arloedh a yn-mes,

hag y'n termyn a gessydhyans yth edh dhe goll.

8Na greg war rychys kevys gans droktra,

rag ny wra ev dha weres yn jydh an terroes.

9Na wynsell gans pub gwyns,

ha na hol pub fordh:

yndella y hwra an peghador dewblek y daves.

10Bydh fyrv y'th konvedhes,

ha gas dhe'th lavar bos kesson.

11Bydh snell dhe glewes,

ha bydh avisys kyns gorthybi.

12Mars eus konvedhes dhis, gorthyp dhe'th kentrevek;

mes mar nyns eus, gorr dha leuv war dha anow.

13Glori ha disenor a dheu dre gewsel,

ha taves den a wra dhodho koedha.

14Na vydh gelwys sklandrer,

ha na gontrewayt gans dha daves,

rag bismer a dheu dhe'n lader,

ha dampnasyon sevur dhe'n re dewblek aga thaves.

15Yn materow meur ha byghan, na bydh heb godhvos.