Simon Mab Onias

1Hembrenkyas y vreder ha goeth y bobel

o an arghoferyas, Simon mab Onias,

neb yn y vewnans a ewnhas an chi,

hag yn y dhydhyow y feu kerys an tempel.50:1 Ow siwya an Ebrow.

2Ev a worras an selveyn dhe'n fosow ughel dewblek,

an fosow ughel a-dro dhe oryon an sentri.

3Yn y dhydhyow dowrargh a veu pelys,

kreun dowr avel an mor yn kompas.

4Ev a brederis fatell sawya y bobel a derroes,

ha kera an sita erbynn esedhva.

5Ass o gloryus, kyrghynnys gans an bobel,

dell dheuth yn-mes a vayl an sentri!

6Avel sterenn an myttin yn mysk an kommol,

avel an loer leun y'n dydhyow apoyntys;

7avel an howl ow splanna war dempel an Ughella,

avel an gammneves ow terlentri yn kommol splann;

8avel rosennow yn dydhyow an kynsa frut,

avel alow ryb fenten a dhowr,

avel egin glas war Lebanon yn jydh a'n hav;

9avel tan hag ynkys yn ynkyslester,

avel lester a owr mortholys

afinys gans pub eghenn a veyn drudh;

10avel olewbrenn kargys gans frut,

hag avel kypresenn a dyv bys y'n kommol.

11Pan wiskas an goen gloryus

hag omwiska yn splannder perfydh,

ev eth yn-bann dhe'n alter sans,

ha gul klos an sentri dhe vos gloryus.

12Pan dhegemmeras an rannow a dhiwleuv an oferysi,

hag ev ow sevel ryb oeles an alter

gans garlont a'y vreder a-dro dhodho,

ev o haval dhe gederwydhenn yowynk yn Lebanon

yn mysk palmwydh oll a-dro.

13Oll mebyon Aron yn aga golewder

a synsis offrynn an Arloedh yn aga diwleuv

a-dherag oll kuntelles Ysrael.

14Ow korfenna an servis orth an alter,

hag owth araya an offrynn dhe'n Ughella, an Ollgalloesek,

15ev a ystynnas y leuv rag an hanaf

ha diveri offrynn diwes a woes an gwinreun;

ev a'n diveris orth troes an alter,

sawer plegadow dhe'n Ughella, Myghtern pubonan.

16Ena mebyon Aron a armas;

i a hwythas aga hirgern a vetol mortholys;

i a sonas tros meur dhe vos klewys

avel kov a-rag an Ughella.

17Ena oll an bobel war-barth yn uskis

a goedhas dhe'n dor war aga fas

dhe wordhya aga Arloedh,

an Ollgalloesek, an Duw Ughella.

18Ena an ganoryon a'n gormolas gans aga levow,

gans tonyow hweg a velodi ow tasseni.

19Ha'n bobel a bysis an Arloedh Ughella

gans pysadow a-rag an Duw tregeredhus,

bys pan veu solempnita an Arloedh gorfennys,

hag i a gowlwrug y servis.

20Ena Simon a dhiyskynnas ha drehevel y dhiwleuv

dres oll kuntelles mebyon Ysrael,

dhe ri bennath an Arloedh gans y dhiwweus

ha dhe wordhya y hanow;

21hag i a omblegyas nessa treveth yn gordhyans,

dhe dhegemmeres bennath an Ughella.

Bennath

22Ha lemmyn bennigewgh an Duw a bup-tra,

a wra marthusyon meur yn pub le,

hag ynkressya agan dydhyow a-dhia'n dorr,

ha dyghtya genen war-lergh y dregeredh.

23Re rollo dhyn lowena a'n golonn,

ha re bo kres yn agan dydhyow yn Ysrael,

kepar hag y'n dydhyow a-henys.

24Re afytthyo dhyn y dregeredh,

ha'gan delivra yn agan dydhyow.

Pennlavar

25Yma diw genedhel yw kasadow dhe'm enev,

ha'n tressa nyns yw kenedhel:

26an re yw trigys yn menydh Seir, ha'n Filistysi,

ha'n bobel foll usi trigys yn Shekem.

27Dyskans yn konvedhes ha godhvos

re skrifis vy y'n lyver ma,

Yesus mab Eleazar mab Siragh a Yerusalem,

neb a dhiveris furneth a'y golonn.

28Gwynn y vys seul a'n jeves bern gans an traow ma.

Seul a's tresor yn y golonn a vydh fur.

29Rag mara's gwra, ev a vydh krev lowr rag pup-tra,

rag golow an Arloedh a splann war y hyns.