Pysadow Yesus Mab Siragh

1My a re gras dhis, A Arloedh ha Myghtern,

ha my a'th wormel, A Dhuw ow Selwyas.

My a re gras dhe'th hanow

2drefenn dha vos ow difresyas ha'm gwereser

ha ty a dhelivras ow horf a dhistruyans

hag a'n antell a daves a sklander,

hag a dhiwweus a wowlever.

Erbynn ow erbynnoryon ty re beu ow gwereser,

3ha ty a'm delivras

yn meuredh dha dregeredh ha'th hanow,

dhiworth dyns parys dhe'm devorya,

dhiworth leuv an re esa ow hwilas ow bewnans,

dhiworth an ankenyow pals a berthis,

4dhiworth tag an tan a bub tu,

ha dhiworth kres an tan na enowis vy,

5dhiworth downder torr ifarn,

ha dhiworth taves avlan ha geryow gow –

6sklander taves kammhynsek derivys dhe'n myghtern.

Ow enev a dheuth nes dhe ankow,

hag yth esa ow bewnans ogas dhe ifarn a-woeles.

7I a'm kyrghynnas a bub tu,

ha nyns esa denvyth dhe'm gweres;

my a hwilas sokor denel,

ha nyns esa travyth.

8Ena my a borthas kov a'th tregeredh, A Arloedh,

ha'th ober a-henys,

ty dhe selwel an re a'th worta

ha'ga sawya a leuv aga eskerens.

9Ha my a dhannvonas ow fysadow yn-bann a'n nor,

ha pysi delivrans dhiworth mernans.

10My a elwis, ‘Arloedh, ty yw ow Thas,

na'm forsak yn dydhyow anken,

pan nag eus gweres erbynn an re orgelus.

11My a wormel dha hanow heb hedhi,

ha kana hymnys grasyans.’

Ow fysadow a veu klewys,

12rag ty a'm sawyas a dhistruyans

ha'm delivra yn termyn anken.

Rakhenna my a re grasow dhis ha'th wormel,

ha my a vennik hanow an Arloedh.

Gwersow Ebrow51:12 Nyns usi an gwersow ma y'n Greka.

Rewgh grasow dhe'n Arloedh, rag ev yw da;

rag y dregeredh a dhur bys vykken.

Rewgh grasow dhe Dhuw an gormoledhow,

rag y dregeredh a dhur bys vykken.

Rewgh grasow dhe withyas Ysrael,

rag y dregeredh a dhur bys vykken.

Ro grasow dhodho neb a formyas pup-tra

rag y dregeredh a dhur bys vykken.

Rewgh grasow dhe dhasprenyas Ysrael,

rag y dregeredh a dhur bys vykken.

Rewgh grasow dhe neb a guntell an re skattrys a Ysrael,

rag y dregeredh a dhur bys vykken.

Rewgh grasow dhodho neb a dhastrehevis y sita ha'y sentri,

rag y dregeredh a dhur bys vykken.

Rewgh grasow dhodho neb a wra korn dhe skylla rag chi Davydh,

rag y dregeredh a dhur bys vykken.

Rewgh grasow dhodho neb re dhewisas mebyon Sadok dhe vos oferysi,

rag y dregeredh a dhur bys vykken.

Rewgh grasow dhe skoes Abraham

rag y dregeredh a dhur bys vykken.

Rewgh grasow dhe garrek Ysak,

rag y dregeredh a dhur bys vykken.

Rewgh grasow dhe Dhuw galloesek Yakob,

rag y dregeredh a dhur bys vykken.

Rewgh grasow dhodho neb re dhewisas Sion,

rag y dregeredh a dhur bys vykken.

Rewgh grasow dhe Vyghtern myghtern an vyghternedh,

rag y dregeredh a dhur bys vykken.

Ev re dhrehevis korn rag y bobel,

gormola dhe oll y syns,

rag fleghes Ysrael, an bobel ogas dhodho. Halleluya.

Bardhonek war Furneth

13Pan en hwath yowynk, kyns mones war ow thravalyow,

my a hwila furneth yn igor y'm pysadow.

14A-rag an tempel my a's pysis,

ha my a's hwila bys y'n diwedh.

15A-dhia'n kynsa bleujenn bys pan adhvesis an gwinreun

ow holonn a lowenhas ynni;

ow throes a gerdhas yn ewnhynseth;

a-dhia'm yowynkneth my a holyas hy olow.

16My a blegyas ow skovarn nebes ha'y degemmeres,

ha my a gavas dhe'm honan meur dhyskans.

17My a avonsyas ynni;

dhodho neb a re furneth my a re golewder.

18Rag my a erviras bewa war-lergh furneth,

ha my o diwysyk rag an da,

ha nevra ny vydhav toellys.

19Ow enev a strivyas gensi,

hag y'm fara my o stroeth.

My a ystynnas ow diwleuv dhe nev,

ha kyni ow diskians anedhi.

20My a settyas ow enev dhedhi,

hag yn puredh my a's kavas.

Dredhi my a waynyas konvedhes a'n dalleth;

yndellma ny vydhav nevra eskesys

21Ow holodhyon o troblys orth hy hwilas;

rakhenna my re waynyas tresor da.

22An Arloedh a ros dhymm ow thaves yn gober,

ha my a'n gormel ganso.

23Dewgh nes dhymm, hwi hag yw andhyskys,

ha triga y'n chi a dhyskans51:23 y'n chi a dhyskans: Y'n tekst ebrow chi midrash..

24Prag y leverowgh y fyll dhywgh an traow ma,

ha prag y hwovedhowgh kemmys syghes meur?

25My a igoras ow ganow ha leverel,

Prenewgh hi rag agas honan heb arghans.

26Gorrewgh agas konna yn-dann an yew,

ha gesewgh agas enev dhe dhegemmeres dyskans;

yn ogas yth yw kavadow.

27Gwelewgh gans agas lagasow agas honan na lavuris marnas boghes

ha kavoes dhymm hebaska meur.

28Klewewgh marnas boghes a'm dyskans,

ha dredhov y kevowgh arghans hag owr.

29Re lowenhaho agas enev yn tregeredh Duw,

ha nevra re vowgh methek orth y wormel.

30Gwrewgh agas ober yn termyn da,

hag yn y dermyn y honan ev a re dhywgh agas gober.