1Na dheus ha bos eskar yn le kar;

rag drog hanow a dhre bismer ha mewl;

yndella yth yw gans an peghador dewblek y daves.

2Na ughelha dha honan dre gusul dha enev,

ma na vo dha enev terrys dhe demmyn kepar ha gans tarow.

3Ty a dhevor dha dhelyow ha distrui dha frut,

ha ty a vydh gesys kepar ha gwydhenn wedhrys.

4Drog enev a dhistru neb a'n kyv,

ha gul dhodho bos skorn y eskerens.

5Lev hegar a gress kowetha,

ha taves grassyes a gress kortesis.

6Bedhens lies an re yw yn kres genes,

mes bedhes dha gusulyoryon onan yn mysk mil.

7Pan waynydh kar, gwayn ev dre brov,

ha na drest ynno re skav.

8Rag yma kar neb yw yndella herwydh y les y honan,

mes na sev genes yn dydh dha drobel.

9Hag yma kar neb a dreyl yn eskar,

ha'th shamya, ow dyllo kedrynn yn poblek.

10Hag yma kar neb yw koweth orth an voes,

mes na sev genes yn dydh dha drobel.

11Yn sewena, ev a omwra par dhis,

ha bos hardh gans dha wesyon;

12mes mars osta uvelhes ev a dreyl er dha bynn,

hag omgudha dhiworthis.

13Bydh diberthys dhiworth dha eskerens,

ha bydh war a'th kowetha.

14Koweth lel yw skovva grev:

seul re'n kavas, re gavas tresor.

15Nyns yw travyth mar dhrudh avel koweth lel,

ha ny yll mantol vyth musura y dhader.

16Koweth lel yw eli bewnans,

ha'n re a berth own a'n Arloedh a'n trov.

17Neb a berth own a'n Arloedh a gevarwoedh y gerensa yn ewn,

rag kepar dell yw ev, yndella yth yw y gentrevek ynwedh.

Bennathow Furneth

18Ow mab, a-dhia'th yowynkneth, dewis dyskans,

ha bys pan vydhydh koth ty a gyv furneth.

19Deus dhedhi kepar hag onan a ar ha hasa,

ha gortos hy threvas dha.

Rag yn hy servis ty a lavur pols byghan,

ha hware ty a dheber hy askorr.

20Hi a hevel bos pur anhwek dhe'n re heb dyskybleth,

ha ny wra den heb kolonn gortos gensi.

21Kepar ha men rag previ, hi a boes warnodho yn krev,

ha ny dhelat orth hy thewlel a-dhiworto.

22Rag furneth yw kepar ha'y hanow,

ha nyns yw hi hewel dhe lies.

23Goslow, ow flogh, ha degemmer ow ervirans,

ha na skorn ow husul.

24Gorr dha dreys yn hy hargharow,

ha'th konna yn hy hollar.

25Gorr dha skoedh yn-danni ha'y doen,

ha na vrogh yn-dann hy hadonyow.

26Deus dhedhi gans dha enev oll,

ha gwith hy fordhow gans oll dha nerth.

27Hwither ha hwila, ha hi a vydh aswonnys dhis,

ha pan settydh dalghenn ynni, na wra hy livra.

28Rag y'n diwedh ty a gyv an powes a re hi,

ha hi a vydh treylys dhe lowena ragos.

29Ena, hy hargharow a dheu ha bos skovva grev ragos,

ha'y holmow a vydh pows splann.

30Hy yew yw afinans owrek,

ha'y holmow yw kordenn las.

31Ty a's gwisk avel dillas gloryus,

ha'y gwiska kepar ha kurun a lowena.

32Mar mynnydh, ow flogh, ty a vydh dyskyblys,

ha mar omredh, ty a dheu ha bos doeth.

33Mar kerydh goslowes, ty a gyv godhvos,

ha mar plegydh dha skovarn ty a dheu ha bos fur.

34Sav yn kuntelles an henavogyon.

Piw yw fur? Glen orto.

35Bydh parys dhe woslowes orth pub kows duwek,

ha na as dhe henlavarow fur diank dhiworthis.

36Mar kwelydh den poellek, ke dh'y weles a-varr,

gas dhe'th troes esknias y dreudhow.

37Preder a ordenansow an Arloedh,

hag ombreder pup-prys a'y worhemmynnow.

Ev a fast dha golonn,

ha'th hwans a furneth a vydh grontys dhis.