Doethter ha Skians Da

1Na dhebat yn lymm gans den galloesek,

ma na goetthi yn y dhiwla.

2Na omdhal gans den rych,

rag own bos y bythow moy ages dha bythow jy;

rag owr re dhistruis meur a dus,

ha kammdreylya kolonnow myghternedh.

3Na dhadhel gans den tavosek,

na bernya keunys war y dan.

4Na wra ges a dhen drog y vegyans,

ma na vo despitys dha hendasow.

5Na geredh den neb eus ow treylya dhe-ves dhiworth peghes;

porth kov ni oll dhe vos kablus.8:5 kablus: Amendys, ow siwya an Ebrow.

6Na dhispres den pan yw koth,

rag yma re ahanan ynwedh ow tos ha bos koth.

7Na lowenha yn mernans den;

porth kov, res yw dhyn ni oll tremena.

8Na skon kows tus fur,

mes omro dh'aga henlavarow;

rag dhiworta ty a wayn dyskans

ha dyski fatell servir brasyon.

9Na fyll dhe attendya kows an henavogyon,

rag i a dhyskas dhiworth aga thasow,

ha dhiworta ty a wayn konvedhes

ha dyski fatell worthybir pan vo res.

10Na worr tan yn regydh peghador,

ma na vo leskys yn flammow aga than.

11Na sev ha mos dhe-ves dhiworth polat tont,

ma na wrowettho yn kontrewaytyans erbynn dha eryow.

12Na prest dhe dhen yw kreffa agesos;

mes mar kwredh presta neppyth, bydh avel onan neb re'n kollas.

13Na re goestel dres dha bygans,

mes mar redh goestel, bydh parys dhe vos an taler.

14Na dhalleth ken erbynn breusyas,

rag yn revrons dh'y savla i a re an vreus.

15Na draval yn hyns gans polat diswar,

ma na vo ev beghus dhis;

rag ev a wra herwydh y vodh,

ha der y follneth ty a dhe goll ganso.

16Na striv gans den tesek

ha na dremen der an gwylvos ganso;

rag nyns yw goes travyth yn y wolok,

hag yn le ma nag eus gweres yn ogas, ev a'th wysk dhe'n dor.

17Na omgusul gans foll,

rag ny yll ev gwitha kevrin.

18A-rag estren na wra travyth a dal bos gwithys privedh,

rag ny wodhes pandr'a wra ev disklosya.

19Na dhiskudh dha golonn dhe bub den oll,

ma na dewlli dha fortun teg dhe-ves.8:19 ma na dewlli dha fortun teg dhe-ves: Ow siwya an Ebrow. Greka ma na attallo favour dhis.