Kusul a-dro dhe Venynes

1Na borth avi a wreg dha askra,

ha na dhysk dhedhi drog dhyskans dhe'th pystik dha honan.

2Na ro dha honan dhe venyn,

may stankyo hi war dha nerth.

3Na dheus nes dhe venyn lows,

ma na goetthi yn hy antylli.

4Na vydh yn fenowgh gans kanores,

ma na vi maglennys yn hy hastys.

5Na lagatt orth gwyrghes,

rag own ty dhe drebuchya ha ty a dal pe pris priosoleth rygdhi.

6Na ro dha enev dhe horys,

ma na gelli dha eretons;

7na vir a-dro yn stretys an sita,

ha na wander a-dro yn hy rannow ynyal.

8Treyl dha dhewlagas dhiworth benyn fethus,

ha na lagatt orth tekter gwreg gour arall;

meur a dus re beu ledys yn sowdhan gans tekter benyn,

ha dredho kerensa a dhew kepar ha tan.

9Na esedh nevra gans gwreg gour arall,

na gevrenna gensi yn kevewi a win,

ma na dreyllyo dha golonn a-denewen dhedhi,

hag y'th spyrys ty a slynk dhe dhistruyans.

Dewis Kowetha

10Na forsak kar koth,

rag ny yll onan nowydh bos par dhodho.

Kar nowydh yw kepar ha gwin nowydh;

pan vydh adhves ty a'n yv gans plesour.

11Na borth avi orth sewena peghador,

rag ny wodhes fatell vydh y dhiwedh.

12Na gemmer delit yn pythow a bles an re dhidhuw;

porth kov na vydhons kevys ankablus bys y'n bedh.

13Gorta yn pellder dhiworth den ha dhodho galloes dhe ladha,

ha ny vydhydh prederus drefenn own a vernans.

Mes mar teudh nes dhodho, na wra treuspass,

ma na lattro ev dha vewnans.

Godhvydh yth esos ow kerdhes yn mysk antylli,

ha dha vos ow mos a-dro war fosow an sita.

14Gwella gylli, hwila aswonn dha gentrevogyon,

hag omgusul gans an re fur.

15Bedhes dha resnans gans tus a gonvedhes,

ha bedhes dha dhadhel a-dro dhe lagha an Ughella.

16Bedhes gwer wiryon dha gowetha orth kinyow,

ha bedhes dha vost yn own an Arloedh.

17Oberenn yw gormelys rag sleyghneth an greftoryon,

yndella hembrenkyas pobel yw prevys fur der y eryow.

18Gour tavosek yw ownys yn y sita,

ha'n den yw diswar yn lavar a vydh kesys.