1Rosenn a Sharon ov vy,

lilienn a'n nansow.

2Avel lilienn yn mysk an spern,

yndella yw ow hares yn mysk an myrghes.

3Avel avalenn2:3 avalenn: Po brykedhwydhenn. yn mysk gwydh an goeswik,

yndella yw ow haradow yn mysk an vebyon.

Gans meur a dhesir my a esedhas yn y woskes,

ha hweg o y frut dhe'm stevnik.

4Ev re'm kyrghas a-berth y'n gwinji,

ha'y vaner a-ughov o kerensa.

5Sostenewgh vy gans tesennow-grappys,

megewgh vy gans avalow,2:5 avalow: Po brykedh.

drefenn ow bos klav dre gerensa.

6Yma y leuv gledh yn-dann ow fenn,

hag yma y leuv dhyghow orth ow byrla!

7My re'gas konjor, A vyrghes Yerusalem,

re'n yorghes po re'n ewigow a'n mesyow,

Na wra dhe gerensa difuna na movya

bys pan vynno hi.

An Nessa Kan

8Lev ow haradow!

otta, ev a dheu,

ow lamma war an menydhyow,

ow terlemmel war an breow.

9Ow haradow yw kepar hag ewik,

po karow yowynk.

Ottava, ow sevel

a-dryv agan fos,

ow mires a-bervedh der an fenestri,

ow hwithra der an gloes.

10Ow haradow a gews ha leverel dhymm,

‘Sav ow hares, ow hwegoll,

ha deus dhe-ves,

11Rag otta, gyllys yw an gwav,

passys dhe-ves yw an glaw – gyllys yw.

12Omdhiskwedhes a wrug an bleujennow war an tir,

an termyn rag kana2:12 kana: Po amendyans skethra, ow siwya an Septuagint ha'n Vulgat. yw devedhys,

ha lev an durenn

yw klewys yn agan bro.

13An figbrenn a dheg hy figys gwyrdh,

ha'n gwinbrennyer a dheg aga bleujyow;

i a re ethenn.

Sav, ow melder, ow thekka,

ha deus dhe-ves.’

14Ow holommenn, yn folsyow an garrek,

yn goskes an kleger,

diskwedh dhymm dha fas,

gas vy dhe glewes dha lev,

rag hweg yw dha lev,

ha teg yw dha fas

15Dalghennewgh ragon an owrgeun,

an owrgeun byghan

neb a dhistru an gwinlannow,

pan dheg agan gwinlannow aga bleujyow.

16Ow haradow yw dhymmo vy, ha dhodho ev yth ov vy,

ev a besk yn mysk an lili.

17Bys pan anello an jydh,

ha'n skeusow a vo fiys dhe'n fo,

treyl, ow haradow, bydh kepar hag ewik, po karow yowynk,

war an menydhyow a spisys.