1Otta, teg osta ow hares,

otta, ass osta teg!

Dha dhewlagas yw kelemmi

a-dryv dha vayl.

Dha vlew yw avel gre a ever,

ow lamma yn-nans war ledrow Gilead

2Dha dhyns yw kepar ha gre a dheves knyvys

devedhys yn-bann dhiworth an wolghva,

pub huni anedha ow toen gevellyon,

heb onan vyth anedha ow kelli askorr.

3Avel neusenn gogh yw dha dhiwweus,

ha hweg yw dha anow.

Dha eryow yw avel tregh a reunaval

a-dryv dha vayl.

4Kepar ha tour Davydh yw dha gonna,

drehevys gans resyow a veyn,

warnodho ow kregi mil vokler,

i oll skoesow kasoryon.

5Dha dhiwvronn yw avel diw elen,

gevellyon a ewik,

neb a beur yn mysk an lili.

6Bys pan anello an jydh,

ha'n skeusow a fi dhe'n fo,

my a dhe'n menydh a vyrr,

ha dhe'n vre a frankynkys.

7Teg osta, ow hares;

nyns eus namm ynnos.

8Deus a-dhiworth Lebanon, ow fries,

deus a-dhiworth Lebanon.

Diyskynn a-dhiwar dopp Amana,

a-dhiwar benn Senir ha Hermon,

a-dhiworth fowys lewyon,

a-dhiworth menydhyow lewpardes.

9Ty re ladras ow holonn, ow hwoer, ow fries,

ty re ladras ow holonn der unn mir uskis a'th tewlagas,

der unn degenn a'th torgh.

10Ass yw hweg dha gerensa, ow hwoer, ow fries!

ass yw gwell dha gerensa ages gwin,

ha sawer dha oylys ages oll spisys!

11Dha dhiwweus a dhever mel dell ve dhiworth an gribenn, ow fries;

yma mel ha leth yn-dann dha daves,

hag ethenn dha dhillas yw avel ethenn Lebanon.

12Lowarth yn-dann alhwedh yw ow hwoer, ow fries,

lowarth alhwedhys, fenten selys.

13Dha eginyow yw paradhis a reunavalow

gans frut dentethyel,

henna gans spiknard,

14spiknard ha safron, kalamus4:14 kalamus: Korsenn hweg, Acorus calamus, ynperthys dhe'n Tir Sans dhiworth Eynda yn furv polter. Pur dalvosek o, ha devnydhys yn oyl sans an untyans, Eks 30:23 hag y'n melysethow an moyha drudh. ha kinnamon,

gans pub gwydhenn frankynkys,

myrr hag aloes,

gans oll an gwella spisys.

15Fenten yn lowarth, fenten a dhowrow bew,

ha goverow ow resek yn-nans dhiworth Lebanon.

16Difun, A wyns an gogledh,

ha deus, A wyns an dyghow!

hwyth war ow lowarth,

dhe lesa y spisys.

Des ow haradow dh'y lowarth,

ha dybri y frut dentethyel.