1My re dheuth a-berth y'm lowarth, ow hwoer, ow fries,

my re guntellas ow myrr gans ow spis,

my re dhybris ow kribenn mel gans ow mel,

my re evas ow gwin gans ow leth.

Dybrewgh, A gowetha, evewgh,

ha bedhewgh medhow dre gerensa.

An Peswora Kan

2Yth esov vy ow koska, mes ow holonn yw difun.

Son ow haradow ow knoukya:

‘Igor dhymmo vy, ow hwoer, ow hares,

ow holommenn, ow benyn berfydh;

rag bos ow fenn glyb dre luth,

ow hudynnow dre lybor an nos.’

3My re dhiwiskas ow fows,

yw res dhymm gwiska arta?

My re wolghas ow threys,

yw res dhymm aga mostya?

4Ow haradow a worras y leuv dre doll an klykket,

ha'm torr a veu movyes ganso.

5My a sevis yn-bann dhe igeri dhe'm karadow,

hag ow diwleuv a dheveras gans myrr,

ha'm bysies gans lin myrr,

war ebilyer an florenn.

6My a igoras dhe'm karadow,

mes ow haradow a dreylyas, ha gyllys o dhe-ves.

Ow enev a fyllis pan gewsis ev.

My a'n hwilas, mes ny wrug vy y gavoes;

my a'n gelwis, mes ny worthybis dhymm.

7An woelyadoryon a'm kavas,

hag i ow mos a-dro y'n sita;

i a'm gweskis, i a'm golias,

i a dennas ow mantell dhe-ves,

goelyadoryon an fosow.

8My a'gas konjor, A vyrghes Yerusalem,

mar kevowgh ow haradow,

leverewgh orto

ow bos klav dre gerensa.

9Pyth yw dha garadow moy es neb karadow arall,

ty dekka yn mysk benynes?

Pyth yw dha garadow moy es neb karadow arall,

may hwre'ta agan konjorya yndella?

10Ow haradow yw splann ha rudhik y liw,

heb par yn mysk deg mil.

11Y benn yw owr, owr fin;

y gudynnow yw krullys,

mar dhu avel marghvran.

12Y dhewlagas yw kepar ha kelemmi

ryb goverow dowr,

golghys yn leth,

desedhys yn ewn.

13Y dhiwvogh yw kepar ha bleujyowek a spisys

gans losow sawrek ow tevi ynni;

avel lili yw y dhiwweus,

ow tevera gans lin myrr.

14Avel gwelynni owr yw y dhiwvregh,

afinys gans topaz;

y dorr yw plat5:14 plat: An Ebrow yw ansertan; martesen: gweyth. a dhans olifans,

afinys gans saffir.

15Y dhiwarr yw kolovenyow a varbel,

desedhys war grawyow a owr;

y semlans yw kepar ha Lebanon,

bryntin avel an kederwydh.

16Y anow yw a'n hwekka,

hag ev yw plegadow yn tien.

Hemm yw ow haradow ha hemm yw ow har,

A vyrghes Yerusalem.