1Ass yw teg dha dhewdroes yn sandalyow,

A vyrgh pennsevik!

Avel tegennow yw dha dhiwvordhos rond,

gweyth diwleuv krefter.

2Dha vegel yw bolla krenn

nag eus fowt pyment dhedhi.

Dha dorr yw graghell a waneth,

settys a-dro gans lili.

3Dha dhiwvronn yw avel diw elen,

gevellyon a ewik.

4Kepar ha tour gwrys a dhans-olifans yw dha gonna,

dha dhewlagas avel pollow yn Heshbon,

ryb yet Bath-rabbim.

Dha droen yw kepar ha tour Lebanon,

ow mires war-tu ha Damaskus.

5Dha benn warnas yw avel Karmel,

ha'th vlew lows yw avel purpur;

hag yma myghtern maglennys y'n kudynnow.

6Ass osta teg ha hegar,

A gares, gans dha dhelitys!

7Dha figur yw avel palmwydhenn,

ha dha dhiwvronn avel bagasow a rappys.

8Yn-medhav, ‘My a yskynn an palmwydhenn

ha settya dalghenn yn hy barrennow.’

A, re bo dha dhiwvronn kepar ha bagasow a'n gwinbrenn,

hag ethenn dha anall avel avalow7:8 avalow: Po brykedh.,

9ha'th stevnik kepar ha'n gwin gwella

ow mos smodh yn-nans,

ow slynkya dres ow diwweus ha'm dyns.7:9 ow slynkya dres ow diwweus ha'm dyns: Amendys. Ebrow ow mos yn-nans dhe'm karadow yn leven, ow slynkya dres gweusyow koskadoryon.

10My yw dhe'm karadow,

ha warnav yw y dhesir.

11Deus, ow haradow,

gas dhyn ni mos yn-mes dhe'n mesyow,

ha growedha dres an nos yn mysk an prysk henna:7:11 yn mysk an prysk henna: Po yn mysk an trevow.

12Gas dhyn ni mos a-brys dhe'n gwinlannow,

ha gweles mars eus eginyow a vleujyow war an gwinbrennyer,

mars yw an bleujennow igor

ha mars yw an greunavalow yn aga bleujyow.

Ena my a re dhis ow herensa.

13An mandragorow a re ethenn,

hag orth agan darasow yma frutys an moyha hweg,

nowydh hag ynwedh koth,

gwithys genev ragos, ow haradow.