1A pes avel broder dhymmo vy,

neb a sugna diwvronn ow mamm!

Ena, pan y'th welen vy y'n stret, my a ammsa dhis,

ha ny vien vy dispresys

2My a'th hembronksa, ha'th tri

a-berth yn chi ow mamm a'm omdhuk,8:2 a'm omdhuk: Amendys war-lergh an Septuagint. Ebrow a'm dysk.

ha ri pyment dhis,

sugen an greunaval.

3Yma y leuv gledh yn-dann ow fenn,

hag yma y leuv dhyghow orth ow byrla!

4My a'gas konjor, A vyrghes Yerusalem,

Na wra dhe gerensa difuna na movya

bys pan vynno hi!

An Hweghves Kan

5Piw yw hemma, ow tos yn-bann dhiworth an gwylvos,

ow poesa war hy haradow?

Yn-dann an avalenn8:5 an avalenn: Po an vrykedhwydhenn. my a'th wrug dhe dhifuna;

ena dha vamm a'th tineythis,

ena yth esa hi yn lavur neb a'th omdhuk.

6Desedh vy avel sel war dha golonn,

avel sel war dha vregh,

rag bos kerensa mar grev avel ankow,

hy avi mar dhibita avel ifarn;

hy flammow yw lughes a dan,

losk a'n kreffa.

7Ny yll dowrow lower difeudhi kerensa,

byth moy ny yll livow hy beudhi.

Mar profsa den rag kerensa

oll rychys y ji,

skornys yn tien via henna.

8Yma dhyn ni hwoer vyghan,

ha nyns eus diwvronn dhedhi;

pandr'a yllyn ni gul rag agan hwoer,

y'n jydh may hwovynnir rygdhi?

9Mars yw hi fos,

ni a dhrehav warnedhi tour a arghans;

ha mars yw hi daras,

ni a's ke gans askell kederwydh.

10Fos ov vy,

hag ow diwvronn yw kepar ha touryow;

yndella yth ov vy, yn y dhewlagas,

kepar hag onan neb a gyv kres.

11Yth esa dhe Solomon gwinlann yn Baal-hamon;

ev a settyas y winlann dhe wobrenoryon.

Res o dhe bub huni dri rag y frutys mil vath a arghans.

12Ow gwinlann, ow honan, yw dhymmo vy,

ha Solomon, ty a bew an mil,

ha gwithysi an frutys a bew dew kans.

13Ty neb usi trigys y'n lowarthyow,

yma'n gowetha ow koslowes orth dha lev;

gas vy dh'y glewes.

14Fisten dhe-ves, ow haradow,

ha bydh kepar hag ewik

po karow yowynk war an menydhyow a spisys.