1An Gan a Ganow, dhe Solomon.

An Kynsa Kan

2Re ammo ev dhymm gans ammow y anow –

rag gwell yw dha gerensa ages gwin.

3Ethenn dha oylys yw da,

dha hanow yw avel oyl dinewys;

rakhenna gwyrghesow re'th karas.

4Tenn vy war dha lergh – poenya a wren!

An myghtern re'm kyrghas a-bervedh yn y jambouryow,1:4 An myghtern re'm kyrghas a-bervedh yn y jambouryow: Po Doro vy, A vyghtern, y'th chambour.

Heudhik on ni ha ni a lowenha ynnos;

ni a govha dha gerensa moy ages gwin,

yn ewn i re'th karas!

5Du ov vy, ha teg,

A vyrghes Yerusalem,

kepar ha tyldow Kedar,

kepar ha kroglennow Solomon.

6Na vir orthiv rag ow bos nebes du,

rag an howl re'm loskas.

Serrys orthiv o mebyon ow mamm,

y hwrussons dhymm bos gwithyades an gwinlannow,

ow gwinlann ow honan ny wrug vy hy gwitha.

7Deriv dhymm, ty garadow ow enev,

ple hwre'ta peski an deves,

ple hwre'ta gul dhedha growedha y'n hanter-dydh,

rag prag yth ov vy avel benyn kudhys gans vayl,

ryb greow dha gowetha?

8Mar ny wodhes,

ty dekka yn mysk benynes,

ke yn hyns war-lergh olow an flokk,

ha pask dha vynnow

ryb tyldow an vugeledh.

9My a'th kehevel, ow huv kolonn,

orth kasek yn mysk charettow Faro.

10Teg yw dha dhiwvogh gans kadonyow a degennow,

dha gonna gans tergh a gregyn.

11Ni a wra garlontow a owr dhiso,

gans bannaghow a arghans.

12Pan esa an myghtern orth y voes,

yth esa ow spiknard ow ri y ethenn.

13Yth yw ow harer dhymm avel yalgh a vyrr,

a'y growedh ynter ow diwvronn.

14Ow huv kolonn yw dhymm avel tyskenn a vleujennow henna,

yn gwinlannow En-gedi!

15Otta! teg os, ow huv kolonn,

Otta, teg os,

kelemmi yw dha dhewlagas.

16Otta, teg os, ow huv kolonn,

hegar yn hwir.

Gwyrdh yw agan gweli.

17Kederwydh yw kebrow agan chiow,

agan styllyow yw prenn meryw.