Salusyans

1Powl, gwas Duw hag abostol Yesu Krist, war-lergh fydh an re yw dewisys gans Duw hag aswonnvos an gwir yw yn akord gans sansoleth, 2yn govenek bewnans heb worfenn a ambosas Duw, neb na wowlever, kyns termyn heb worfenn. 3Ev a dhiskwedhas y er y'n termyn gwiw dre bregoth a veu gorrys y'm charj war-lergh gorhemmynn Duw agan Selwador,

4Dhe Titus, ow gwir flogh war-lergh an fydh yw rynnys genen:

Gras ha kres1:4 Gras ha kres: War-lergh re a'n dornskrifow Gras, tregeredh ha kres. dhiworth Duw an Tas ha Krist Yesu agan Selwador.

Ober Titus yn Kreta

5Rakhenna my a'th hasas yn Kreta mayth ordennes an taklow erell hag apoyntya henavogyon1:5 henavogyon: Greka presbyteryon. yn pub tre, dell erghis vy dhis, 6nebonan heb defowt, gour unn wreg gans fleghes a grys, heb kuhudhans a vewnans avlan na direwl. 7Rag y koedh dhe'n epskop bos divlam, avel rennyas Duw, heb gorthter, na sorr skav, nag yw omres dhe win, nag yw striver na kraf, 8mes hel, karer dader, doeth, ewnhynsek, sans, omrewlys, 9ow synsi an ger len war-lergh an dyskas may hallo ha keski der an dyskas yagh ha konkludya an re a gews er y bynn.

10Rag yma lies den heb rewl a gews yn euver hag yn hwowek, dres oll tus an trodreghyans. 11Res yw gul tewel dhedha, neb a dhomhwel teyluyow dien ow tyski dhedha taklow na dhegoedh rag krefni plos. 12Yn-medh onan anedha i, onan aga frofoesi i, ‘Tus Kreta yw pup-prys gowleverysi, drog vestes, kowlogyon dhiek.’ 13Gwir yw an dustuni ma. Rakhenna, gwra aga heredhi yn tynn may fons i yagh y'n fydh, 14heb gul vri a hwedhlow yedhowek na gorhemmynnow tus a skon an gwir. 15Pup-tra yw glan dhe'n re yw glan, mes dhe'n re yw legrys ha diskryjyk, nyns yw travyth glan, mes legrys yw ha'ga brys ha'ga howses. 16I a lever i dhe aswonn Duw, mes yn aga gwriansow i a'n nagh. Kasadow ha diwostydh yns i hag anwiw rag pub gwrians da.