Dyski Dyskas Yagh

1Mes ty, lavar an pyth a dhelledh dhe dhyskas yagh, 2tus koth dhe vos divedhow, sad, fur, yagh yn fydh, yn kerensa, hag yn perthyans.

3Y'n keth vaner lavar dhe'n benynes koth mayth omdhokkons dell dhegoedh dhe sansoleth heb sklandra, heb bos kethesow dhe veur a win, mes dyskadoresow a'n pyth yw da, 4may tyskons an benynes yowynk dhe gara aga gour ha'ga fleghes, 5dhe vos fur, chast, bysi y'n chi, gostydh orth aga gour i, ma na vo ger Duw despitys.

6Y'n keth vaner gwra keski an wer yowynka may fons fur. 7Yn pup-tra omdhiskwa yn patron gwriansow da, glander y'th tyskas, sevureth, 8kows yagh, divlam may fo eskar shamys heb kavoes travyth drog dhe leverel a-dro dhyn.

9Gwra keski kethwesyon may fons gostydh dh'aga mestrysi yn pup-tra, dhe blegya yn ta heb dadhel, 10heb ladra, mes ow tiskwedhes pub lelder da, mayth afinnons dyskas Duw agan Selwador yn pup-tra.

11Rag gras Duw re omdhiskwedhas, ow tri selwyans dhe bub den oll 12orth agan dyski may hwryllyn hepkorr ansansoleth ha drokhwansow an bys, ha bewa gans doethter, gwiryon ha sans y'n oes ma, 13ow kortos an govenek gwynnvys ha'n omdhiskwedhyans a'n splannder a'n Duw meur ha'gan Selwador Krist Yesu, 14neb a omros ragon ni may hwrella agan dasprena dhiworth pub ober dilagha ha glanhe ragdho pobel dh'y berghennogeth y honan, diwysyk yn gwriansow da.

15Gwra derivas an taklow ma, hag ynnia ha keredhi gans pub awtorita. Na wres denvyth dha dhispresya.