Gwitha Oberow Da

1Kovha i may fons gostydh dhe rewloryon ha galloesow, dhe obaya, dhe vos parys rag pub ober da, 2heb leverel drog a dhenvyth, heb kedrynna, klor, hag ow tiskwedhes pub uvelder dhe dus oll. 3Rag ni ynwedh o foll, diwostydh, toellys, kethwesyon dhe drokhwansow ha plesours divers, ow pewa yn atti hag avi, kasadow, hag ow kasa an eyl y gila. 4Mes pan omdhiskwedhas kuvder ha kerensa Duw agan Selwador, 5ny'gan selwis ev dre wriansow a wrussyn ni yn ewnder, mes war-lergh y dregeredh ev dre wolghi daskenesigeth ha nowydhheans an Spyrys Sans 6a dhiveris warnan yn rych dre Yesu Krist agan Selwador, 7may teffyn ha bos heryon war-lergh govenek bewnans heb worfenn, justifiys gans y ras. 8Lel yw an ger.

My a vynn ty dhe ynnia an taklow ma, may prederro an re re wrug krysi yn Duw a-dro dhe omri dhe oberow da. An taklow ma yw da ha dhe les dhe vab-den. 9Mes skon hwithransow gokki, aghskrifow, strifow hag omladhow a-dro dhe'n lagha, rag heb les hag euver yns i. 10Den a wra folsyow,3:10 Den a wra folsyow: Po Den neb yw eretik. wosa kynsa ha nessa gwarnyans, skon ev, 11ow kodhvos den a'n par na dhe vos treylys yn kamm, ha peghador; omdhampnys yw.

12Pan dhannvonniv Artemas po Tyghikus dhis, gwra assaya dhe dhos dhymm yn Nikopolis rag ena re erviris spena an gwav. 13Zenas, an laghyas, hag Apollos, dannvon i yn hast war aga fordh ma na fallo travyth dhedha. 14Ha dyskens agan tus ynwedh omri dhe oberow da rag kollenwel edhommow a res, ma na vons i heb frut vyth.

15Oll an re usi genev a'th tynnergh. Dynnargh an re a'gan kar y'n fydh.

Gras re bo genowgh hwi oll.3:15 War-lergh re a'n dornskrifow yma dhe dhiwedh an wers Amen.