1Lyver oberow Tobit mab Tobiel mab Ananiel mab Aduel mab Gabael, a has Asiel ha loeth Naftali,1:1 An treylyans ma yw selys war codices Alexandrinus ha Vaticanus. 2neb a veu kemmerys yn kethneth yn dydhyow Shalmaneser myghtern Assyria, a-dhiworth Thisbe, usi a'n dhyghowbarth dhe Kedesh Naftali yn Galile a-ugh Asher.

Yowynkneth Tobit ha'y Vewnans Mas

3My, Tobit, a gerdhi yn fordhow gwirder hag ewnder dydhyow oll ow bewnans, ha my a wrug lies ober alusenek dhe'm breder ha'm kenedhel hag eth genev dhe bow Assyria, dhe Nineve. 4Lemmyn pan esen vy y'm pow ow honan, yn pow Ysrael, ha my hwath den yowynk, an loeth kowal a Naftali ow ragdas a gilfias a'n chi a Yerusalem. Hemm o an tyller re bia dewisys mes a oll loethow Ysrael, le may tela oll an loethow sakrifia ha le may feu sakrys ha fondys tempel trigva an Ughella rag pub henedh bys vykken.

5Oll an loethow hag a junyas an negedhses a wre sakrifia dhe'n leugh Baal, par dell wre ynwedh chi Naftali ow thas. 6Mes my e ow honan yn fenowgh dhe Yerusalem rag an goelyow, dell yw ordenys rag Ysrael oll der arghadow bys vykken, ow kemmeres kynsa froeth ha degedhow ow askorr ha'n kynsa knyvyansow; my a re an re ma dhe'n oferysi, mebyon Aron, orth an alter. 7A'm askorr oll my a re unn degves rann dhe vebyon Levi a venystra yn Yerusalem; an nessa degves my a werthi, ha my a wre mos ha spena an budh pub blydhen yn Yerusalem; 8an tressa degves my a re dhe'n re may koedha dhedha ow dever, dell worhemmynnis dhymm Debora, mamm ow thas, drefenn ow bos gesys omdhivas gans ow thas. 9Devedhys dhe wourses, ev a dhemmedhis Anna, esel agan teylu, ha dredhi my a dheuth ha bos tas Tobias.

Kemmerys avel Keth dhe Nineve

10Lemmyn pan veuv degys dhe-ves yn kethneth dhe Nineve, ow breder oll ha'm neskerens a dhybris boes an Jentilys; 11mes my ow honan a omwithas rag y dhybri, 12drefenn my dhe brederi a Dhuw gans leun golonn. 13Ena an Ughella a ros dhymm faverans ha fisment da a wel dhe Shalmaneser, ha my o y brener a broviansow. 14Yndella, my a wre mos bys yn Media, hag unnweyth dhe Rages yn Media my a asas deg talent a arghans yn trest gans Gabael, broder Gabrias. 15Mes pan verwis Shalmaneser, Sennagherib y vab a reynyas yn y le; yn-danno an fordhow o deantell, ma na yllyn mos na fella yn Media.

Kolonnekter owth Ynkleudhyans an Re Varow

16Yn dydhyow Shalmaneser my a wrug lies ober alusenek dhe'm breder. 17My a re ow bara dhe'n re nownek ha'm dillas dhe'n re noeth; ha mar kwelyn nebonan a'm kenedhel marow ha tewlys a-ves a-dryv fosow Nineve, my a'n ynkleudhya. 18Ha Sennagherib an myghtern, mar korras dhe'n mernans neb a dheuth ow fia a-dhiworth Yudi, my a's ynkleudhyas yn-dann gel. Rag yn y sorr ev a worras lies huni dhe'n mernans. Pan veu hwilys an korfow gans an myghtern, ny vons diskudhys. 19Ena onan a dus Nineve eth ha meneges dhe'n myghtern a-dro dhymm, my dh'aga ynkleudhyas; ytho my a omgudhas. Pan dhyskis i dhe vos orth ow hwilas rag bos gorrys dhe'n mernans, my a fias yn own. 20Ena pup-tra a veu dhymm a veu kemmerys a-dhiworthiv, ha nyns esa travyth gesys dhymm marnas ow gwreg Anna ha'm mab Tobias.

21Mes le es hanter-kans dydh a dremenas kyns dew a vebyon Sennagherib dh'y ladha, hag i a fias dhe venydhyow Ararat. Ena Esarhaddon, y vab, a reynyas yn y le; hag ev a settyas Ahikar, mab ow broder Anael, dres akontow oll y wlaskor ha dres y venystrans oll. 22Ahikar a bysis a'm govis, ha my a dhehwelis dhe Nineve. Lemmyn, Ahikar o hanafor, gwithyas an bysow-sel, menystrer hag akontydh, neb a wrussa Esarhaddon y ordena nessa dhodho y honan. Ev o ow noy.