Preder an Gerens

1Lemmyn yth esa y das Tobit ow nivera pub dydh, ha pan dheuth dydhyow an vyaj dhe benn ha nyns ens devedhys, 2ev a leveris, ‘A yll bos aga bos lettys? Po a yll bos, Gabael dhe verwel ha nyns eus nagonan dhe ri dhodho an arghans?’ 3Hag ev o grevys meur. 4Ha'y wreg a leveris dhodho, ‘An maw re verwis; rag ev re strechyas an termyn.’ Ena hi a dhallathas kyni ragdho, ha leverel, 5‘A nyns ov vy grevys, ow flogh, ma'th hesis dhe vones, ty neb yw golow ow dewlagas?’ 6Mes Tobit a leveris dhedhi, ‘Bydh kosel ha hedh dha breder; yma ev yn poynt da?’

Tobias ha Sara a Dhalleth an Fordh Dhe-dre

7Ha hi a worthybis dhodho, ‘Bydh tawesek ha na'm toell na fella; ow flogh re verwis.’ Ha hi e yn-mes pub dydh dhe'n fordh dredhi may tibarthsons; ny dhybri hi travyth dydhweyth, ha der an nosow ny astelas hi kyni rag hy mab Tobias, bys pan dheuth peswardhek dydh an goel demmedhyans dhe benn, may tosa Raguel y koedha dhodho triga ena.

8Tobias a leveris dhe Raguel, ‘Gwra ow dannvon dhe-ves, rag nyns eus govenek dhe'm tas na dhe'm mamm a'm gweles arta.’ 9Mes y hwegron a leveris dhodho, ‘Trig genev, ha my a wra dannvon kannasow, hag i a re dhodho derivadow, fatell yw traow genes.’ Tobias a worthybis, ‘Na, dannvon vy dhe'm tas.’ 10Ytho Raguel a sevis ha ri dhodho y wreg Sara ha hanter y bythow yn kethyon, chatel hag arghans. 11Ha wosa ev dh'aga benniga ev a's dannvonas dhe-ves, ow leverel, ‘Duw nev a wra dhywgh seweni, ow fleghes, kyns my dhe verwel.’ 12Ynwedh ev a leveris dh'y vyrgh, ‘Gwra enora dha hwegron ha'th hweger; i yw lemmyn dha gerens. Gas vy dhe glewes derivas da ahanas.’ Hag ev a ammas dhedhi. 13Hag Edna a leveris dhe Tobias, ‘An Arloedh a nev re'gas drollo dhe dre yn saw, broder ker, ha grontya dhymm dhe weles dha fleghes der ow myrgh Sara, may lowenhahiv a-rag an Arloedh. Otta, my a re ow myrgh dhis yn trest; na wra travyth dh'y duwena.’