Vyaj dhe Dre

1Wosa hemma Tobias eth war y hyns, ow kormel Duw drefenn ev dhe wul sewen y vyaj. Hag ev a vennigas Raguel ha'y wreg Edna. Yndellma ev a besyas mos war y vyaj bys pan dheuthons nes dhe Nineve. 2Ena Rafael a leveris dhe Tobias, ‘A ny wodhes, broder, fatell essys dha das? 3Gwren poenya yn-rag a-dherag dha wreg ha pareusi an chi. 4Ha kemmer bystel an pysk y'th leuv.’ Ytho i a holyas aga hyns, ha'n ki eth war aga lergh.

5Lemmyn Anna o esedhys ow mires a-dro rag gweles hy mab war an fordh. 6Ha hi a'n aswonnis, hag ev ow tos, ha leverel dh'y das, ‘Ottomma dha vab ow tos, keffrys ha'n den neb eth ganso!’

Golok Tobit Restorys

7Rafael a leveris, ‘My a woer, Tobias, y hwra dha das igeri y dhewlagas. 8Res vydh dhis ytho elia y dhewlagas gans an vystel; ha pan loesons ev a's rut hag a wra dhe'n kennennow gwynn koedha a-ves, hag ev a wra dha weles.’

9Ena Anna a boenyas dhe vetya gansa, ha koedha war gonna hy mab, ha leverel dhodho, ‘My re'th welas, ow mab; alemma rag parys ov dhe verwel.’ Hag i a dhagrewis aga dew. 10Tobit a dhallathas mos war-tu ha'n daras, ha trebuchya. Mes y vab a boenyas dhodho 11ha dalghenna y das, hag ev a skoellyas an vystel war dhewlagas y das, ow leverel, ‘Bydh kolonnek, tas.’ 12Ha pan dhallathas y dhewlagas dhe loesa ev a's rutyas, ha'n gwynnennow a veu pilys a gornellow y dhewlagas. 13Ena ev a welas y vab ha koedha war y gonna hag ev a dhagrewis ha leverel,

14‘Benniges osta a Dhuw,

ha benniges yw dha hanow bys vykken,

ha benniges yw oll dha eledh sans;

Rag ty a'm skorjyas,

mes ty a gemmeras truedh ahanav;

otta, my a wel ow mab Tobias!’

15Ha'y vab eth a-ji yn unn lowenhe, hag ev a dherivas dh'y das an traow meur o hwarvedhys dhodho yn Media.

16Ena Tobit eth dhe vetya gans y wohydh dhe yet Nineve, ow lowenhe hag ow kormel Duw. An re a'n gwelas dell eth a's tevo marth drefenn bos golok dhodho. Ha Tobit a wodhva gras a-ragdha bos Duw truedhek dhodho. 17Pan nesas Tobit dhe Sara y wohydh, ev a's bennigas, ow leverel, ‘Wolkomm, myrgh! Benniges yw Duw re'th tros dhyn, ha benniges yw dha das ha'th vamm.’ 18Yndellma yth esa heudhder yn mysk y vreder oll yn Nineve. 19Ahikar ha'y noy Nadab a dheuth, ha demmedhyans Tobias a veu solempnys seyth dydh gans lowender meur.