Gobrow Rafael

1Ena Tobit a elwis y vab Tobias ha leverel dhodho, ‘Ow mab, dyght gobrow an den neb eth genes; hag y tal bos res moy dhodho.’ 2Ev a worthybis, ‘Tas, ny wrussa ow aperya mar rollen dhodho an hanter a'n pyth a dhres vy tre. 3Rag ev a'm dros dhis yn saw, ev a yaghhas ow gwreg, ev a gavas an arghans ragov vy, hag ev a'th yaghhas jy ynwedh.’ 4An den koth a leveris, ‘Ev a'n dendilas.’ 5Ytho ev a elwis an el ha leverel dhodho, ‘Kemmer an hanter a beub re dresowgh.’

Ynnians Rafael

6Ena ev a's gelwis aga dew yn privedh ha leverel dhedha: ‘Bennigewgh Duw ha ri grasyans dhodho; gwra y meurhe ha godhvos gras dhodho a-rag an re vew oll, drefenn an pyth a wrug ragowgh. Da yw benniga Duw hag ughelhe y hanow, yn enor ow tisplegya oberow Duw. Na vedhewgh lent dhe rassa dhodho. 7Da yw kudha kevrin myghtern, mes diskudha yn splann oberow Duw. Gwrewgh dader, ha ny wra drogedh agas kavoes. 8Pysadow yw da keveylys gans penys hag alusen hag ewnhynseth. Boghes gans ewnhynseth yw gwell ages meur gans drogober. Gwell yw ri alusenow ages kuntell owr. 9Rag alusen a lyver a vernans, hag y hwra kartha pub pegh dhe-ves. An re a wra gwryth cherita hag ewnhynseth a's tevydh leunder a vewnans; 10mes an re a begh hag a wra anlaghedh yw eskerens aga bewnans aga honan.

Rafael a Dhisklos y Honanieth

11‘Ny vynnav keles travyth a-dhiworthowgh. My re leveris, “Da yw kudha kevrin myghtern, mes diskudha yn splann oberow Duw.” 12Ha lemmyn, ty ha'th wohydh Sara pan byssowgh, my a dhros kovheans a'gas pysadow a-rag an Sans; ha pan ynkleudhsowgh an re varow, keffrys yth esen genowgh. 13Pan na hoksys dhe sevel ha gasa dha ginyow rag mos ha maylya an den marow, ny veu kelys ahanav dha ober mas, mes yth esen genes. 14Lemmyn Duw a'm dannvonas dhe'th yaghhe, ty ha'th wohydh Sara. 15My yw Rafael, onan a'n seyth el sans a dhre pysadow an syns yn-bann ha mos a-dherag golewder an Sans.’

16Aga dew o fest troblys; hag i a goedhas war aga fas, rag own a's teva. 17Mes ev a leveris dhedha, ‘Na vydhowgh ownek; kres re'gas bo! Gormelewgh Duw bys vykken. 18Rag ny dheuth vy avel favour a'm parth vy, mes dre vodh agan Duw. Ytho gormelewgh ev bys vykken. 19Oll an dydhyow ma ny wren marnas omdhiskwedhes dhis, ha ny dhybris nag eva, mes hwi a welewgh gwelesigeth. 20Ha lemmyn gwra godhvos gras dhe Dhuw, rag my a yskynn dhe neb a'm dannvonas. Skrif yn lyver pup-tra re hwarva.’ 21Ena i a sevis; mes ny'n gwelsons namoy. 22Ytho i a avowas oberow meur ha marthys Duw, ha fatell omdhiskwedhas dhedha el an Arloedh.