Grasow Tobit dhe Dhuw

1Ena Tobit a skrifas pysadow a heudhder, ha leverel:

2‘Benniges yw Duw a vew bys vykken, ha'y wlaskor,

rag ev a skorj, hag ev a dhiskwedh tregeredh;

ev a hembronk yn-nans dhe ifarn hag ev a dhre yn-bann,

ha nyns eus denvyth a yll diank a'y leuv.

3Gwra y aswonn a-rag an kenedhlow, a vebyon Ysrael,

rag ev re'gan skattras yntredha.

4Gwra dh'y veurder bos aswonnys ena,

ha'y ughelhe yn golok pup-tra vew;

drefenn y vos agan Arloedh ha Duw,

ev yw agan Tas bys vykken.

5Ev a wra agan skorjya rag agan kammweythresow;

hag arta ev a wra diskwedhes tregeredh,

ha'gan kuntell a'n kenedhlow oll

may fewgh skattrys.

6Mar treylyowgh dhodho a leun golonn hag a leun enev,

ow kul an pyth yw gwir a-dheragdho,

ena ev a wra treylya dhywgh

ha ny wra ev kudha y fas ahanowgh.

7Mes mirewgh orth an pyth a wra ev gul genowgh;

godhvydhewgh gras dhodho a leun lev.

Gormelewgh an Arloedh a ewnder,

hag ughelhe Myghtern an oesow.

8My a woer gras dhodho yn tir ow hethneth,

ha my a dhiskwedh y nerth ha meuredh dhe genedhel a beghadoryon.

Kildreylyewgh, hwi beghadoryon, ha gwrewgh ewnder a-dheragdho;

piw a woer mara's degemmer ha kemmeres tregeredh warnowgh?

9My a ughelha ow Duw;

ow enev a ughelha an Myghtern a nev,

hag a lowenha yn y veuredh.

10Kewses tus oll, ha godhvos gras dhodho yn Yerusalem.

A Yerusalem, an sita sans,

ev a'th skorj rag oberow dha vebyon,

mes arta ev a gemmer truedh a vebyon an re wiryon.

11Godhvydh gras yn wordhi dhe'n Arloedh,

ha gormel Myghtern an oesow

may fo drehevys y dylda ragos arta gans lowena.

12Re lowenhaho ynnos an re yw kethyon,

ha kara ynnos an re yw grevys,

dhe oll an henedhow bys vykken.

13Lies kenedhel a dheu a bellder dhe hanow an Arloedh Duw,

ow toen rohow yn agan dorn, rohow rag an Myghtern a nev.

Henedhow a henedhow a re dhis gormel lowenek.

14Milliges yw oll an re a'th kas;

benniges bys vykken vydh oll a'th kar.

15Lowenha ha bydh heudhik rag mebyon an re wiryon;

rag i a vydh kuntellys war-barth, hag a wormel Arloedh an re wiryon.

Gwynn aga bys an re a'th kar!

I a lowenha y'th kres.

16Gwynn aga bys an re a dhuwenas drefenn dha alarow;

rag i a lowenha warnas ow kweles dha wolewder oll,

hag i a vydh heudhhes bys vykken.

Re wormello ow enev Duw an Myghtern meur.

17Rag Yerusalem a vydh drehevys yn saffir ha gwyrven,

dha fosow yn meyn drudh,

ha'n touryow ha'n gorthfosow yn owr pur;

Ha stretow Yerusalem a vydh gorhudhys

gans meyn a veryl ha rubi,

ha meyn a owr dhiworth Ofir.

18Hy bownderyow oll a lever Halleluya!

ha kanmel, ow leverel, “Benniges yw Duw,

re'th ughelhas bys vykken.” ’