1Pan dheuth tre ha'm gwreg Anna ha'm mab Tobias daskorrys dhymm, prys goel Penkost, hag yw goel sakrys an seyth seythun, kinyow da a veu pareusys dhymm ha my a esedhas dhe dhybri. 2Ow kweles palster a voes, y leveris dhe'm mab, ‘Ke ha dri den boghosek pynag a gyffi neb a breder a'n Arloedh, ha my a'th worta.’ 3Mes ev a dhehwelis ow leverel, ‘A Das, onan a'gan kenedhel re beu tegys ha tewlys a-berth yn plen an varghas.’ 4Ytho kyns tastya travyth, my a lammas yn-bann ha kemmeres an korf yn-bann, ha'y worra yn neb stevell bys yn termyn howlsedhes. 5Wosa dehweles, my a omwolghas ha dybri ow boes yn ahwer. 6Ena, my a borthas kov a brofoesans Amos, fatell leveris,

‘Agas goelyow a vydh treylys dhe gynvann,

hag oll agas kanow dhe oelva.’

Ha my a dhagrewis.

Tobit Devedhys Dall

7Wosa an howl dhe sedhi, my eth dhe balas bedh hag ynkleudhyas an korf. 8Ha'm kentrevogyon a hwarthas orthiv ow leverel: ‘Ny'n jeves ev own na fella a vos gorrys dhe'n mernans rag gul hemma; ev a boenyas dhe-ves, hag ottava arta owth ynkleudhyas an re varow.’ 9An keth nos my a dhehwelis a'y ynkleudhyas, ha drefenn ow bos defolys my a goskas ryb fos an garth, ha'm fas ankudhys. 10Ny wodhyen bos golvanes y'n fos, hag i a skomblas glus toemm y'm dewlagas igor, ha gwynnennow a furvyas war ow dewlagas. Ahikar, byttegyns, a'm gwithas bys pan eth ev dhe Elymais.

Gwreg Tobit a Dhendil aga Fygans

11Ena yth esa ow gwreg Anna ow tendil arghans orth ober benynes. 12Hi a wre dannvon an askorr dhe'n berghennogyon. Unn prysweyth pan besons hy arveth, i a ros dhedhi ynwedh mynn; 13ha pan dhehwelis hi dhymm ev a dhallathas bryvya. Ytho my a leveris dhedhi, ‘Ple kevsys an mynn? Ledrys yw, a nyns yw? Daskorr e dhe'n berghennogyon; rag nyns yw ewn dybri an pyth yw ledrys.’ 14Ha hi a leveris, ‘Res veu dhymm yn ro yn keworrans dhe'm arveth.’ Mes ny grysis dhedhi, ha leverel dhedhi dh'y dhaskorr dh'y berghennogyon; ha my a rudhas gans sorr orti. Ena hi a worthybis dhymm, ‘Ple'ma dha alusenow ha dha wriansow gwiryon? Pup-tra yw godhvedhys a-dro dhis!’