Pysadow Tobit

1Ena y'm anken my a oelas, ha pysi yn angoes, ow leverel,

2‘Gwiryon os ta, A Arloedh;

oll dha wriansow yw ewn;

oll dha fordhow yw tregeredh ha gwirder,

ha ty a wra gwirvreus hag ewnder bys vykken.

3Porth kov ahanav

ha mir warnav;

na'm kessydh drefenn ow feghosow

ha'm treuspassow anwodhvedhys,

ha'n re a veu gwrys a-ragos gans ow thasow.

4Rag i a skonyas a woslowes orth dha worhemmynnow,

ha ty a'gan ros dhe bylla, kethneth, ha mernans;

ty a'gan gwrug avel ensampel a geredh

yn mysk oll an kenedhlow may feun skattrys.

5Ha lemmyn dha lies barn yw gwir,

orth ow dyghtya war-lergh ow feghosow vy

ha re ow thasow,

drefenn na withsyn dha worhemmynnow

na kerdhes yn gwirder a-ragos.

6Ha lemmyn dyght vy herwydh dha blesour;

gorhemmynn ow spyrys dhe vos kemmerys yn-bann,

may fydhav livrys ha dos ha bos dor.

Rag gwell yw dhymm merwel ages bewa,

drefenn my dhe glewes fals keredhyow,

ha meur yw an duwon ynnov.

Gorhemmynn may fiv livrys a'm galar

dhe vos dhe'n drigva heb diwedh;

na dreyl dha fas ahanav.’

Sara Kammguhudhys

7Y'n keth jydh na, y hwarva ynwedh, Sara myrgh Raguel, a Ekbatana yn Media, dhe vos keredhys gans maghtethyon hy thas, 8drefenn hi dhe vos res dhe seyth gour, ha'n tebel jevan Asmodeus dhe ladha peub anedha kyns i dhe vos gensi avel gwreg. Yndella an maghtethyon a leveris dhedhi, ‘A ny gonvedhydh ty dhe daga dha wer? Ty a' feu seyth anedha seulabrys ha ny' feu prow a nagonan anedha. 9Prag y'gan skorjydh? Marow mars yns, ke gansa! Gwaytyn na wellyn bythkweth mab na myrgh ahanas!’

Pysadow Sara rag Mernans

10Wosa klewes an traow ma, hi o grevys meur, bys yn preder a omgregi. Mes hi a leveris, ‘Unn vyrgh ow thas ov vy; mar kwrav hemma, y fydh meth dhodho, ha my a dhre y gothni yn ahwer dhe'n bedh.’ 11Ytho hi a bysis troha'n fenester ha leverel,

‘Benniges os ta, A Arloedh ow Duw,

ha benniges yw dha hanow sans hag enorys bys vykken.

Re'th wormello oll dha oberow bys vykken.

12Ha lemmyn, A Arloedh, my re dreylyas ow dewlagas

ha'm fas war-tu ha ty.

13Gorhemmynn may fiv livrys a'n bys,

ha ma na glewiv keredh namoy.

14Ty a woer, A Arloedh, ow bos glan

a oll peghes gans gour,

15ha ny vostis ow hanow

na hanow ow thas yn tir ow hethneth.

Unn vyrgh ow thas ov vy,

ha ny'n jeves flogh dhe vos y her,

na neskar, na mab neskar

may tal dhymm omwitha ragdho avel gwreg.

Seulabrys seyth gour ahanav yw marow.

Prag y res dhymm bewa?

Mes mar nyns yw plegadow dhis kemmeres ow bewnans,

gorhemmynn may fo revrons diskwedhys dhymm

ha may fo truedh kemmerys ahanav,

ha ma na glewiv keredh namoy.’

Gorthyp dhe Bysadow

16Pysadow aga dew a veu klewys a-rag golewder Duw. 17Ha Rafael a veu dannvenys dh'aga yaghhe aga dew: dhe bilya an gwynnennow a-dhiworth dewlagas Tobit; dhe ri Sara myrgh Raguel yn demmedhyans gans Tobias mab Tobit, ha dhe gelmi Asmodeus an tebel jevan, rag y koedhas dhe Tobias an gwir dh'y havoes dre eretons. Dhe'n keth pols na Tobit a dhehwelis hag entra a-berth yn y ji, ha Sara myrgh Raguel a dhiyskynnas a'y stevell y'n soler.