An El Rafael

1Ena Tobias a worthybis dhodho, ‘Tas, my a wra pup-tra re worhemmynnsys dhymm; 2mes fatell allav kavoes an arghans pan na aswonnav an den?’ 3Ena Tobit a ros dhodho an skrifenn ambos, ha leverel dhodho, ‘Hwila den dhe vones genes ha my a be y arveth hedre vewiv; ha ke dhe gavoes an arghans.’

4Ytho ev eth dhe hwilas den; hag ev a drovyas Rafael, neb o el, 5mes Tobias ny'n godhya. Tobias a leveris dhodho, ‘A yllydh dos genev dhe Rages a Media? A aswonnydh an tylleryow na?’ 6An el a worthybis dhodho, ‘My a genes; an fordh yw aswonnys dhymm, hag yth esen trigys gans agan broder Gabael.’ 7Ena Tobias a leveris dhodho, ‘Gorta vy ha my a lever dhe'm tas.’ 8Hag ev a leveris dhodho, ‘Ke, ha na wra strechya.’

Ytho ev a entras ha leverel dh'y das, ‘My re drovyas nebonan dhe vones genev.’ Yn-medh ev, ‘Galow ev dhymm, may tyskiv a by loeth yth yw, ha mars yw den fydhyadow dhe vones genes.’

9Ytho Tobias a'n gelwis; ev a entras hag i a salusis an eyl y gila. 10Ena Tobit a leveris dhodho, ‘Ow broder, a by loeth hag a by teylu osta? Diskwedh e dhymm.’ 11Mes ev a worthybis, ‘A hwilydh loeth ha teylu, po goberwas dhe vones gans dha vab?’ Ha Tobit a leveris dhodho, ‘My a garsa godhvos, ow broder, dha bobel ha'th hanow.’ 12Ev a worthybis, ‘Azarias ov vy, mab an Ananias meur, onan a'th neskerens.’ 13Ena Tobit a leveris dhodho, ‘Wolkomm os, ow broder. Na sorr orthiv drefenn y fynnis godhvos dha loeth ha'th teylu. Ty yw neskar dhymm; a linyeth dha ha nobyl. Rag my a aswonni Ananias ha Nathan, mebyon a'n Shemaia meur, pan en war-barth dhe Yerusalem dhe wordhya hag offrynna kynsa-genys agan parys ha degedhow agan askorr. Ny wrussons mos yn stray yn kammwrians agan breder. Ow broder, ty yw devedhys a wreydhenn dha. 14Mes lavar dhymm, pana arveth a wrav vy pe dhis? draghma pub dydh, ha spenansow ragos kepar ha'm mab? 15Ha dres henna, my a wra keworra dhe'th arveth mar tehwellowgh yn yeghes da.’ 16Ytho i a akordyas yndella.

Ena ev a leveris dhe Tobias, ‘Gwra ombareusi dhe'n vyaj, ha re sewennowgh.’ Ytho y vab a dharbaris taklow dhe'n vyaj. Ha'y das a leveris dhodho, ‘Ke gans an den ma; Duw, trigys yn nev, a wra may sewenno agas fordh, ha gwres y el mos genowgh.’ Ytho i eth yn-kerdh ha diberth, ha ki an den yowynk esa gansa.

17Mes Anna, y vamm, a dhallathas oela ha leverel dhe Tobit, ‘Prag y tannvensys agan flogh dhe-ves? A nyns yw ev bagel agan leuv dell a a-ji hag yn-mes a-ragon? 18Na geworr arghans dhe arghans, mes re bo ronson rag agan flogh. 19Rag an pygans a veu res dhyn gans an Arloedh yw lowr ragon.’ 20Hag yn-medh Tobit dhedhi, ‘Na breder, ow hwoer; ev a wra dehweles yn yeghes da, ha dha dhewlagas a'n gwel. 21Rag el da a wra mos ganso; y vyaj a vydh sewen, hag ev a wra dehweles yn yeghes da.’ Ena hi a astelas hy oelvann.