Vyaj dhe Rages

1Lemmyn dell ens yn-rag war aga hyns, i a dheuth gorthugherweyth dhe'n avon Tigris ha kampya ena. 2Ena an den yowynk a dhiyskynnas dhe omwolghi. Pysk a lammas a'n avon hag a vynna lenki an den yowynk; 3ha'n el a leveris dhodho, ‘Kemmer an pysk.’ Ytho an den yowynk a dhalghennas an pysk ha'y dewlel war an tir. 4Ena an el a leveris dhodho, ‘Trogh an pysk ha kemmer an golonn ha'n avi ha'n vystel ha'ga gorra dhe-ves gans rach.’ 5Ytho an den yowynk a wrug dell worhemmynnis an el; hag i a rostyas ha dybri an pysk. Ha'ga dew i a besyas mos war aga hyns bys pan dheuthons nes dhe Ekbatana.

6Ena an den yowynk a wovynnas orth an el, ‘Broder Azarias, pana dhevnydh yw avi ha kolonn ha bystel an pysk?’ 7Ev a worthybis dhodho, ‘A-dro dhe'n golonn ha'n avi, mar kwra jevan po tebel spyrys trobla nebonan, ty a wra mog a'n re ma a-rag gour po gwreg, ha ny vydh troblys nevra namoy. 8Hag a-dro dhe'n vystel, gwra elia gensi den a'n jeves gwynnennow yn y dhewlagas hag ev a vydh yaghhes.’

Dyskansow Rafael

9Pan nesens dhe Rages6:9 Rages: War-lergh dornskrif arall, Ekbatana. 10an el a leveris dhe'n den yowynk, ‘Broder, hedhyw ni a wra godriga gans Raguel. Ev yw dha neskar, hag ev a'n jeves myrgh, henwys Sara. 11Yma dhis an gwir dh'y demmedhi ha dh'y erita, rag ty yw hy unn neskar. An vowes yw teg ha fur keffrys. 12Lemmyn goslow orthiv. My a vynn kewsel gans hy thas, ha kettell dhehwellyn a Rages ni a wra solempnya an demmedhyans. Rag my a woer na yll Raguel, herwydh lagha Moyses, hy ri dhe gen gour heb degemmeres spal mernans, rag dhiso jy moy es dhe nebonan yw an gwir dhe'n eretons.’

13Ena an den yowynk a leveris dhe'n el, ‘Broder Azarias, my re glewas y feu an vowes res dhe seyth gour ha peub a verwis y'n chambour priosel. 14Lemmyn, my yw an unn mab a'n jeves ow thas, hag own a'm beus mar entrav y farwav par dell wrug an re a-ragov, rag yma jevan yn kerensa gensi, ha ny bystik ev nagonan marnas an re a nes dhedhi. Ytho yma own dhymm may ferwiv ha dri bewnans ow thas hag ow mamm dhe'n bedh yn ahwer a'm govis vy. Ha ny's teves mab arall dh'aga ynkleudhyas.’

15Mes an el a leveris dhodho, ‘A ny berthydh kov a'n geryow gansa may worhemmynnis dhis dha das dhe gemmeres gwreg dhiworth chi dha das? Lemmyn goslow orthiv, broder, rag hi a dheu ha bos dha wreg; ha na breder a'n jevan rag an keth nos ma hi a vydh res dhis yn demmedhyans. 16Pan entrydh an chambour priosel, ty a wra kemmeres regydh a ynkys ha gorra warnedha rann kolonn hag avi an pysk rag gul mog. 17Ena an jevan a's blas ha fia dhe'n fo heb dehweles arta nevra bys vykken. Ha pan dheudh nes dhedhi, sevewgh agas dew, ha pysi war an Duw tregeredhus, hag ev a wra agas selwel ha kemmeres truedh ahanowgh. Na gemmer own, rag hi a veu destnys ragos a-vynitha. Ty a wra hy selwel, ha hi a wra mos genes, hag y tesevav y' fydh fleghes dredhi.’ Pan glewas Tobias an traow ma, ev a goedhas yn kerensa gensi, ha'y spyrys a veu kelmys nes dres eghenn dhedhi.