Tobias a Feth an Jevan

1Wosa i dhe worfenna dybri, i a ledyas Tobias a-ji dhedhi. 2Ha dell esa ow mos, ev a borthas kov a eryow Rafael, hag ev a gemmeras an regydh a ynkys ha gorra warnedha rann kolonn hag avi an pysk ha gul mog. 3Ha pan vlasas an jevan an ethenn, ev a fias dhe'n pella rann a Ejyp, ha'n el a'n kolmas.

4Pan veu aga dew deges a-ji war-barth, Tobias a sevis a'n gweli ha leverel, ‘Hwoer, sav, ha pysyn may kemmerro an Arloedh tregeredh warnan.’ 5Ha Tobias a dhallathas leverel,

‘Benniges osta, a Dhuw agan tasow,

ha benniges yw dha hanow sans ha gloryus bys vykken.

Re'th vennikko an nevow ha'th kreaturs oll.

6Ty a wrug Adam ha ri dhodho Eva y wreg

avel gweres ha skoedhyans.

Anedha re dheuth an agh a dhensys.

Ty a leveris, “Nyns yw da bos den y honan;

gwren gul gweres ragdho avello ev.”

7Ha lemmyn, A Arloedh, nyns yw rag lust

y kemmerav ow hwoer ma,

mes gans lenduri.

Gront may kyffiv tregeredh

ha kothhe war-barth gensi.’

8Ha hi a leveris ganso, ‘Amen.’ 9Ena i a goedhas yn kosk aga dew rag an nos.

10Mes Raguel a sevis ha mos dhe balas bedh, gans an preder, ‘Martesen ev ynwedh a wra merwel.’ 11Ena Raguel eth a-berth yn y ji 12ha leverel dh'y wreg Edna, ‘Dannvon onan a'n maghtethyon dhe weles mars yw bew; ha mar nyns yw, gwren y ynkleudhyas heb denvyth dhe wodhvos yn y gever.’ 13Ytho an vaghteth a igoras an daras ha mos a-ji, ha'ga havoes agas dew yn kosk. 14Hag hi a dheuth yn-mes ha leverel dhedha y vos yn few. 15Ena Raguel a vennigas Duw ha leverel,

‘Benniges os ta, a Dhuw, gans pub bennath pur ha sans.

Re'th vennikko dha syns ha dha greaturs oll;

re'th vennikko oll dha eledh

ha dha bobel dhewisys bys vykken.

16Benniges osta, drefenn ty dhe wul dhymm bos heudhik.

Ny hwarva dhymm par dell ownen vy;

mes ty re'gan dyghtyas herwydh dha dregeredh meur.

17Benniges osta, drefenn ty dhe dhiskwedhes truedh

war dhew flogh unn-dhineythys.

Diskwa tregeredh dhedha, a Vester;

ha doro aga bewnans dhe geweras

yn sawder gans lowender ha tregeredh.’

18Ena ev a worhemmynnis orth y servysi dhe lenwel an bedh.

Goel Demmedhyans

19Ena ev a ros goel demmedhyans ragdha hag a dhuryas peswardhek dydh. 20Ha kyns bos deu dydhyow an goel, Raguel a leveris dhe Tobias gans ti na goedha dhodho diberth kyns bos gorfennys peswardhek dydh an goel demmedhyans, 21hag ena y koedha dhodho kemmeres hanter pythow Raguel ha dehweles yn sawder dh'y das, hag y fedha an remenant dhodho ‘Pan varwo ow gwreg ha my.’