Oberow Furneth a-dhia Adam bys Yosep

1Furneth a withas an tas kynsa-formys a'n bys,

hag ev unnsel kreatys;

hi a'n delivras dhiworth y beghadow,

2ha ri dhodho nerth dhe rewlya pup-tra oll.

3Mes pan dhibarthas den anwiryon dhiworti yn y sorr,

ev eth dhe goll drefenn yn konnar ev dhe ladha y vroder.

4Dre reson henna, pan veu an norvys livys, arta furneth a'n selwis,

ha lewya hyns an den gwiryon dre damm a brenn a dalvosogeth vyghan.

5Furneth ynwedh, pan via an kenedhlow yn drog akord gorrys yn deray,

hi a aswonnis an den gwiryon ha'y witha divlam a-rag Duw,

ha'y witha krev yn spit dh'y druedh troha y vab.

6Pan esa an re dhidhuw ow merwel hi a dhelivras den gwiryon,

neb a fias dhiworth an tan a goedhas war an pymp sita.

7Hwath bys y'n jydh hedhyw yma dustuni a'ga drogober:

difeyth ow megi prest,

plansow ow toen frut na adhves nevra,

ha pilar a hoelan ow sevel avel men-kov dhe enev diskryjyk.

8Rag drefenn i dhe dremena dres furneth,

ny vons unnsel lettys ma na aswonnsons an taklow da;

mes ynwedh i a asas war aga lergh dhe'n bys men-kov a'ga follneth,

ma na allas aga difygyow nevra bos heb aga merkya.

9Mes furneth a dhelivras dhiworth ankenyow an re a's servyas.

10Pan fias den gwiryon dhiworth konnar y vroder,

hi a'n gidyas yn hynsyow ewn;

hi a dhiskwedhas dhodho gwlaskor Duw,

ha ri dhodho godhvos a daklow sans;

hi a'n gwrug dhe sewena yn y lavuryow,

hag ynkressya frut y lavur.

11Yn krefni an re esa orth y arwaska,

hi a sevis rybdho ha'y wul rych.

12Hi a'n defendyas dhiworth y eskerens,

ha'y witha saw dhiworth an re a'n kontrewaytyas;

yn y gesstrif kales hi a ros dhodho an trygh,

may hwodhve bos revrons dhe Dhuw kreffa ages pup-tra oll.

13Pan veu den gwiryon gwerthys, ny wrug furneth y forsakya,

mes hi a'n delivras dhiworth pegh.

Hi eth yn-nans ganso a-ji dhe'n pytt,

14ha pan esa ev yn kadonyow ny'n gasas,

bys pan dhros dhodho an dernwelenn a wlaskor

hag awtorita war an re esa orth y arwaska.

An re a'n kuhudhas hi a dhiskwedhas dhe vos fals,

ha hi a ros dhodho enor bythkwethek.

Furneth a Hembronkas Ysrael yn-mes a Ejyp

15Pobel sans ha has divlam,

furneth a's dhelivras dhiworth kenedhel a arwaskoryon.

16Hi a entras yn enev gwas an Arloedh,

ha sevel orth myghternedh euthyk gans marthusyon hag toknys.

17Hi a ros dhe bobel sans gober aga lavuryow;

ha'ga hembronk yn fordh varthys,

ha dos ha bos goskes dhedha y'n jydh,

ha flamm sterennek y'n nos.

18Hi a's dros dres an Mor Rudh,

ha'ga hembronk dre dhowrow down;

19mes hi a veu dhis aga eskerens,

ha'ga thewlel yn-bann dhiworth downder an mor.

20Rakhenna an re wiryon a byllas an re dhidhuw;

i a ganas hymnys dhe'th hanow sans, A Arloedh,

ha gormel gans unn akord dha leuv a's defendyas;

21rag furneth a igoras ganow an re avlavar,

ha gul dhe daves fleghigyow kewsel yn kler.