Furneth a Hembronkas Mebyon Ysrael Der an Difeyth

1Furneth a wrug dh'aga ober seweni dre leuv profoes sans.

2I a vyajyas dre wylvos anannedhys,

ha settya yn-bann aga thyldow yn tylleryow hepfordh.

3I a sevis orth aga eskerens ha pellhe aga erbynnoryon.

4Pan y's tevo syghes, i a elwis warnas,

ha dowr a veu res dhedha mes a garrek flynt,

ha dhiworth men kales remedi rag aga syghes.

5Rag der an keth taklow may feu aga eskerens kessydhys dredha,

i aga honan a gavas dader yn aga edhomm.

6Rag yn le fenten a avon prest ow resek,

troblys ha defolys gans goes,

7yn keredh rag an ordenans dresto may feu an fleghigyow ledhys,

ty a ros dhedha kals dowr nag o gwaytys,

8ow tiskwedhes der aga syghes y'n termyn na

fatell gessydhsys aga eskerens.

9Rag pan vons prevys, kynth esens ow pos dyskyblys yn tregeredh,

i a wodhva fatell veu an re dhidhuw tormentys pan vons breusys yn sorr.

10Rag ty a's provas kepar dell wra tas, orth aga heski yn gwarnyans,

mes an re dhidhuw ty a worthapposyas,

ha'ga dampnya kepar dell wra myghtern kales.

11Keffrys an re dhe-ves ha'n re dhe-dre, i a vydh tormentys yn kepar maner,

12rag anken dewblek a's kemmeras,

ha kynvann pan borthsons kov a'n taklow tremenys.

13Rag pan glewsons bos aga hessydhyansow aga honan

dhe les rag an re wiryon, i a welas y vos ober an Arloedh.

14An den a via tewlys yn-mes nans yw pell, ha gesys dhe verwel, neb a dhenaghsons gans skorn,

a dheuth ha bos marth dhedha yn diwedh an hwarvosow;

an syghes a wodhavsons a veu gweth es an pyth a wodhevis an re wiryon.

Kessydhyans an Re Dhrog

15Yn attal a'n resnans foll a'ga anewnder,

hag a's hembronkas yn sowdhan dhe wordhya kramviles direson ha bestes diles,

ty a dhannvonas warnedha routh a greaturs direson dh'aga hessydhya,

16may tyskens, herwydh an taklow may hwra den pegha, der an keth taklow ma ev dhe vos kessydhys.

17Rag dha leuv ollnerthek

hag a wrug an bys yn-mes a vater heb furv,

ny fyllis a'n pygans dhe dhannvon warnedha routh a orses, po lewyon hardh,

18po bestes ankoth nowydh-gwrys leun a gonnar,

a anell ethenn danek yn-mes,

po hwyja yn-mes pall tew a vog,

po lughesi gwryghon euthyk dhiworth aga lagas;

19ny allas an drog a wrussons unnsel distrui tus,

mes ynwedh an wel euthyk anedha a allas aga distrui glan dre skruth.

20Hwath heb an re ma, tus a allsa koedha gans unn anall,

pan vens helghys gans gwirvreus

ha skattrys der anall dha nerth.

Mes ty re arayas pup-tra oll yn musur ha niver ha poes.

Duw yw Galloesek ha Tregeredhus

21Rag ty a yll diskwedhes dha nerth meur pup-prys,

ha piw a yll sevel orth galloes dha vregh?

22Rag yth yw oll an bys a-ragos avel motta usi ow treylya an vantol,

avel banna a luth an myttin a goedh war an dor.

23Mes tregeredhus osta dhe beub, rag ty a yll gul pup-tra oll,

ha ny vynnydh mires orth peghosow tus, may hallons koedha yn edrek.

24Rag ty a gar pup-tra eus,

ha ny gesydh travyth a'n taklow re wruss'ta,

rag ny wrusses neppyth mara'n kasses.

25Fatell allsa neppyth pesya, mar ny ve dha vodh?

Po fatell allsa neppyth bos gwithys mar ny veu gelwys yn-rag genes?

26Ty a spar pup-tra oll, rag ty a's pew, A Arloedh, ty neb a gar enevow.