1Rag yma dha spyrys anvarwel yn pup-tra.

2Rakhenna ty a ewnha tamm ha tamm an re a dreuspass,

ha ty a's kovha ha gwarnya a-dro dhe'n taklow may peghons dresta,

may hallons bos rydhhes a'ga sherewynsi ha gorra aga fydh ynnos jy, A Arloedh.

Peghosow an Kananysi

3An re esa trigys y'th tir sans nans yw pell

4ty a gasas rag aga oberow kasadow,

aga oberow a bystri, hag urdhyansow ansans.

5I a ladhas fleghes yn tidruedh,

ha dybri yn aga goelyow kig ha goes denel sakrifiys;

kevrennoryon vons yn kryjyans kevrinek,

6ynno may hwrug kerens ladha enevow diweres.

Ytho ty a vynnas aga distrui dre leuv agan tasow,

7may halla an tir yw akontys genes an moyha enorys

degemmeres fleghes Duw avel trevesigeth wordhi.

8Mes ty a's sparyas, rag nyns ens saw tus,

ha dannvon goghi avel ragresoryon a'th lu

dh'aga distrui tamm ha tamm,

9kyn nag es'ta dialloes dhe ri an re dhidhuw a-ji dhe dhiwla an re wiryon yn batel,

po aga distrui yn unn lamm gans bestes fell, po gans dha er asper.

10Mes orth aga breusi tamm ha tamm ty a ros dhedha chons a edrek,

kyn nag es'ta heb godhvos aga linyeth dhe vos drog,

ha bos aga sherewynsi genesik ynna,

ha na vedha nevra aga thybyansow treylys.

11Rag has mmilliges dhiworth an dalleth ens.

Ha nyns esa rag own a dhenvyth y's gessys heb kessydhyans rag aga feghosow.

Duw yw Sovran

12Rag piw a lever, ‘Pandr'a wrussys?’

po piw a sev orth dha vreus?

Piw a'th kuhudh rag distruyans kenedhlow a wrussys?

Po piw a dheu a-ragos dhe bledya rag an dus anwiryon?

13Rag naneyl nyns eus duw marnas ty, mayth yw pub den oll bern dhodho,

may tiskwetthes dhedha na vreussys yn anewn;

14na ny yll na myghtern na turant settya y fas er dha bynn a-dro dhe'n re re gessydhsys.

15Ty yw ewn ha ty a rewl pup-tra yn ewn,

ow tybi y vos estren dhe'th halloes

dampnya nebonan na dhervynn bos kessydhys.

16Rag dha alloes yw dalleth ewnder,

ha'th vyghternsys war beub a wra dhis sparya peub.

17Pan berth tus dout a berfydhder dha alloes, ty a dhiskwa dha nerth,

ha ty a geredh tonteth yn mysk an re a'n goer.

18Kynth osta sovran yn nerth, ty a vreus gans kuvder,

ha gans favour meur ty a'gan govern;

rag ty a yll devnydhya galloes peskweyth may fynni.

Dyskansow Duw rag Ysrael

19Der oberow a'n par ma ty re dhyskas dhe'th pobel

bos res an re wiryon dhe vos kuv,

ha ty re lenwis dha vebyon gans govenek da,

drefenn ty dhe ri edrek rag peghosow.

20Rag mar kessydhsys gans rach meur

eskerens dha wesyon ha'n re a dhervynnas an mernans,

ow ri dhedha termyn ha tyller dhe asa aga sherewynsi,

21gans pana stroethter a vreusys jy dha vebyon,

may resys dh'aga thasow tiow ha kevambosow leun a ambosow da!

22Ytho pan esos orth agan kessydhya ty a skorj agan eskerens deg milweyth moy,

may hyllyn ombrederi war dha dhader pan vreusyn,

ha pan on breusys, gwaytyas truedh.

Kessydhyans an Ejyptianys

23Rakhenna an tus a vewas aga bewnans yn anwiryon, yn bewnans a follneth,

ty a dormentyas der aga thaklow kasadow aga honan.

24Rag pan ethons pell yn sowdhan war hynsyow kammweyth,

ow tegemmeres avel duwow an bestes o hwath dispresys gans aga eskerens,

i a veu toellys kepar ha fleghigyow foll.

25Rakhenna, kepar dell ve dhe fleghes na yll resna,

ty a dhannvonas dha vreus dh'aga gesya.

26Mes an re na woslowas orth gwarnyansow keredhyow hwar

a glew breus Duw a dhendilsons.

27Rag pan dheuthons ha bos serrys yn aga duwon

orth an taklow na a dybsens bos duwow, ow pos kessydhys dredha,

i a welas hag aswonn avel gwir Dhuw ev neb a skonsons dhe aswonn kyns.

Yndella dampnasyon a'n brassa a dheuth warnedha.