Follneth Gordhyans Natur

1Rag foll aga gnas o oll tus heb aswonnvos a Dhuw;

ha ny allsons aswonn ev neb usi yn bosva, yn-mes a'n taklow da yw gwelys,

ha ny aswonnsons an Unn usi ow pos, hag i ow prederi a'y oberow;

2mes i a dybis po tan po gwyns po ayr skav,

po kylgh an ster, po dowr terfyskus,

po golowys nev dhe vos duwow a rewl an bys.

3Mar tybi tus, dre dhelit yn aga thekter, an taklow ma dhe vos duwow,

godhvydhens pygemmys gwell ages an re ma yw aga Arloedh,

rag awtour tekter a's gwrug.

4Ha mara's teva marth orth aga galloes hag oberyans,

konvedhens dresta

pygemmys kreffa yw ev neb a's gwrug.

5Rag der an braster ha tekter a daklow gwrys,

pan yns kehevelys, y hyllir gweles an Gwrier.

6Hwath nyns yw an bobel ma dhe vos kablys marnas nebes,

rag martesen i a yn sowdhan

hag i ow hwilas Duw hag ow tesirya y gavoes.

7Rag kyn fewons yn mysk y oberow, hwath i a'n hwila,

ha krysi an pyth a welons, rag teg yw an taklow gwelys.

8Mes ynwedh, ny yllir aga gava;

9rag mara's teffa an galloes dhe wodhvos kemmys

may hallsens hwithra an bys,

fatell wrussens fyllel dhe gavoes yn kynsa an Arloedh a'n taklow ma?

Follneth Gordhyans Idolys

10Mes truan yw an re ma gans aga fydh settys yn taklow marow,

a re an hanow ‘duwow’ dhe oberow diwla tus,

owr hag arghans shapys gans sleyghneth,

ha hevelebow a enyvales,

po men diles, ober leuv goth.

11Lemmyn ser prenn a yll treghi dhe'n leur gwydhenn es dh'y handla

ha kemmeres dhe-ves gans sleyghneth oll hy rusk,

hag ena gans kreft plegadow

gul lester dhe les hag a serv edhommow bewnans,

12ha leski an temmyn a'y ober yw tewlys dhe-ves

dhe bareusi y voes, ha dybri dh'y walgh.

13Mes ev a gemmer tamm yn-mes anedha, nag yw dhe les,

tamm a brenn kamm ha leun a golmow,

ha'y gervya gans rach yn y dermyn rydh,

ha'y shapya gans sleyghneth gwaynys yn sygerneth;

ev a'n furv yn imaj den,

14po y wul avel neb enyval diles,

ha'y bayntya rudh ha liwa y enep rudh

ha kudha pub namm ynno gans paynt;

15ena ev a wra neythik gwiw ragdho

ha'y settya yn fos, ha'y fastya ena gans horn.

16Ev a breder anodho, ma na goettho,

drefenn ev dhe wodhvos na yll gweres y honan,

rag nyns yw marnas imaj hag a'n jeves edhomm a weres.

17Pan wra pysadow a-dro dh'y bythow ha'y demmedhyans ha'y fleghes,

ny'n jeves meth dhe gewsel dhe'n dra dhivew.

18Rag yeghes ev a elow dhe neppyth yw gwann;

rag bewnans ev a bys war neppyth yw marow;

rag gweres ev a bys war neppyth heb prevyans;

rag vyaj da ev a bys war neppyth na yll devnydhya y dreys;

19rag gwaynya arghans hag ober ha sewena gans y dhiwla

ev a bys rag nerth dhiworth neppyth na'n jeves nerth vyth yn y dhiwla.