Siwyansow Da a Wordhyans an Gwir Dhuw

1Mes ty, agan Duw, yw kuv ha gwiryon,

lent ow serri, ow rewlya pup-tra yn tregeredh.

2Rag mar peghyn, dhiso jy yth eson, ha ni a aswonn dha alloes;

mes ny beghyn, drefenn ni dhe wodhvos agan bos reknys dhe vos dhis.

3Rag aswonnvos ahanas yw ewnder dien,

ha godhvos a'th halloes yw gwreydhenn anvarwoleth.

4Rag naneyl ny wrug tebel dhysmygyans tus agan toella,

na lavur difrut an payntyer,

furv payntys gans liwyow divers,

5a's teves semlans hag a wra fellyon dhe yeuni war hy lergh,

may hwansons furv dhianall imaj marow.

6Tus a gar taklow drog, ha na dhervynnons govenek gwell,

yw an re a's gwra po aga desirya po aga gordhya.

Follneth Gordhyans Idolys Pri

7Priweythor a does an pri medhel

hag yn lavurus shapya pub lester rag agan servis,

ow kul yn-mes a'n keth pri

an lestri a serv usyansow glan

ha'n re rag usyansow kontrari, an eyl avel y gila;

mes pandr'a vydh devnydh an eyl po y gila

an priweythor y honan a ervir.

8Gans lavur diles, ev a furv duw koeg dhiworth an keth pri,

an den ma neb a veu gwrys a bri a verr spys kyns,

ha wosa termyn berr ev a dhehwel dhe'n dor may feu kemmerys dhiworto,

pan dheu an termyn dhe dhaskorr an enev a veu prestys dhodho.

9Nyns yw a vern dhodho y vos destnys dhe verwel,

po bos y vewnans berr,

mes ev a gesstriv gans seri owr hag arghans,

hag assaya gul kepar ha gweythoryon brons;

hag ev a syns y teu glori dhodho, rag ev dhe wul gwara fug.

10Lusu yw y golonn, y wovenek yw moy distyr ages dor,

ha'y vewnans yw moy disenorys ages pri,

11drefenn ev dhe fyllel aswonn neb a'n furvyas

ha'y lenwel a enev bew

hag anella spyrys bew a-ji dhodho.

12Mes i a reken agan bewnans dhe vos gwari,

ha bewnans dhe vos dy'goel synsys rag gwayn,

rag yn-medh ev, ‘Res yw den dhe gavoes pygans yn py fordh bynag may haller, kyn fo dre vaynys drog.’

13Rag an den ma, moy ages oll an re erell, a woer ev dhe begha

pan wra dhiworth devnydh a bri lestri brottel hag imajys gravys.

14Mes an moyha foll, ha moy truan ages baban,

yw oll an eskerens a arwaskas dha bobel.

15Rag i a dybis oll idolys an kenedhlow dhe vos duwow,

kyn na's teves naneyl devnydh aga lagasow dhe weles gansa,

na frigow dhe denna anall,

na skovornow rag klewes,

na bysies diwla dhe handla,

ha diles yw aga threys rag kerdhes.

16Rag den a's gwrug,

ha nebonan mayth yw y spyrys kevys yn kendon a's furvyas;

rag ny yll denvyth furvya duw haval dhodho y honan.

17Marwel yw ev, ha'n pyth a wra gans diwla dilagha yw marow;

rag ev yw gwell ages an pythow a wordh,

a-ban ev a'n jeves bewnans, mes i ny vewsons bythkweth.

Serf y'n Difeyth

18Ynwedh, i a wordhyas bestes an moyha kasadow,

yw gweth ages oll an re erell pan yns breusys gans fowt aga skians;

19ha hwath avel enyvales nyns yns mar deg yn semlans may fons desirys,

mes i a fyllis kavoes kommendyans Duw ha'y vennath.