1Rakhenna i a veu kessydhys dell dhegoedhas dre greaturs a'n par na,

ha tormentys dre routh a vestes.

2Yn le kessydhyans ty a dhiskwedhas kuvder dhe'th pobel,

ha ty a bareusis rynki dhe dhybri neppyth gans blas ankoth,

boes ankoth dhe walgha aga ewl;

3may kollens, pan dhesirsons boes,

an lyha remenant a ewl boes

dre reson an hager greaturs dannvenys dhedha,

ha may hwrellens dha bobel, wosa i dhe berthi esow termyn berr,

dybri a'n boes ankoth.

4Rag res o esow anwoheladow dhe dhos war an arwaskoryon na,

ha may fo diskwedhes dhe'th pobel fatell esa aga eskerens ow pos tormentys.

5Rag pan dheuth war dha bobel konnar euthyk kreaturs gwyls

hag yth esons ow pos distruys dre vrathow serf kamm,

ny wrug dha sorr pesya bys y'n diwedh;

6i a veu troblys pols avel gwarnyans,

hag i a dhegemmeras tokyn a dhelivrans dh'aga hovhe a worhemmynn dha lagha.

7Rag ev neb a dreylyas dhe'n tokyn ny veu sawys der an pyth a welas,

mes dredhos jy, Selwador peub.

8Ha dre hemma ynwedh ty a wrug dh'agan eskerens aswonn

dha vos Selwador dhiworth pub drog.

9Mes an re erell a veu ledhys gans brathow lokustes ha kelyon,

ha ny veu kevys ragdha eli vyth,

rag i dhervynnas bos kessydhys dre daklow a'n par na.

10Mes nyns o dha vebyon fethys hwath dre dhyns serf gwenonek,

rag dha dregeredh a dheuth dh'aga gweres ha'ga yaghhe.

11I a veu brethys may kovhasens dha eryow,

hag ena i a veu delivrys skon,

ma na goedhsens yn ankov down

ha dos ha bos dialloes dhe aswonn dha guvder.

12Rag ny wrug naneyl losow na powltis aga yaghhe,

mes yth o dha er, A Arloedh, hag a yaghha peub.

13Rag ty a' fydh galloes war vewnans ha mernans;

ty a led tus yn-nans bys yetys ifarn ha'ga dri yn-bann arta.

14Den yn y dhrogedh a ladh den arall,

mes ny yll dri arta an spyrys diberthys,

na rydhhe an enev prisonys.

Hager-awelyow Terroesus a Wysk Ejyp

15Mes nyns yw possybyl diank a'th torn;

16rag an re dhidhuw, ow skonya dha aswonn,

a veu skorjys dre nerth dha vregh,

helghys gans glawyow ankoth ha hager-awelyow dibita,

ha konsumys glan gans tan.

17Rag, tra a'n moyha marthys, y'n dowr, hag a dhifeudh pup-tra,

yth esa an tan ow kressya moy ha moy;

rag an bys a omladh rag an re wiryon.

18Treweythyow an flamm a veu lettys,

ma na allsa kowlleski an kreaturs a veu dannvenys erbynn an re dhidhuw;

mes dre wel hemma mayth aswonnsens

aga bos helghys dre vreus Duw;

19ha termyn arall hwath yn kres dowr, an flammow a loskas gans nerth moy fers ages tan,

dhe dhifeythya askorr tir an re anwiryon.

Mebyon Ysrael a Dhegemmer Manna

20Yn le an taklow ma ty a ros dhe'th pobel boes a eledh,

ha heb aga lavur ty a dhannvonas dhedha dhiworth nev bara parys dhe dhybri,

ow provia pub plesour, hag owth akordya gans an blas a veu gwell gans kettep onan.

21Rag dha sosten a dhiskleryas dha hwekter troha'th fleghes;

ha'n bara, ow servya rag ewl kettep onan a'n kemmeri, y feu treylys dhe'n pyth o gwell ganso.

22Ergh ha rew a borthas tan heb teudhi,

mayth aswonnens bos trevasow aga eskerens

difeythys gans an tan hag a dhewis y'n keser

ha lughesi y'n kowasow;

23mes an tan, rag may halla an re wiryon bos megys,

a ankovas y nerth y honan hogen.

24Rag kreasyon, orth dha servya jy, neb a'n gwrug,

a striv dhe gessydhya an re anwiryon,

hag a lows y nerth rag les an re a drest ynnos.

25Rakhenna y'n eur na ynwedh, treylys yn pub furv,

ev a servyas dha helder hag a vag pup-tra,

war-lergh desir an re a bys warnas,

26may tyska dha fleghes, a gerydh, A Arloedh,

nag yw tevyans trevasow hag a vag mab-den

mes yth yw dha er a sosten an re a drest ynnos.

27Rag an pyth nag o distruys gans tan,

pan veu toemmhes gans dewynnow berr an howl, a deudhis skon dhe-ves,

28may fia godhvedhys y tegoedh dhyn sevel kyns an howl dhe bysi warnas,

ha bos res dhyn pysi warnas yn bora an jydh;

29rag govenek den nag yw grasek a deudh kepar ha rew gwav,

ha frosa dhe-ves avel dowr skoellys.