Euth a Wysk an Ejyptianys y'n Nos

1Meur yw dha vreusow ha kales dhe styrya;

rakhenna enevow nag yw dyskys gallas yn sowdhan.

2Rag pan dybis an re dhilagha i dhe synsi an genedhel sans yn aga galloes,

i aga honan a wrowedhas avel prisnoryon tewlder hag yn kargharow nos dhidhiwedh,

degys a-ji yn-dann aga tho, divresow dhiworth an ragbreder bythkwethek.

3Rag yn aga feghosow kevrinek i a dybi na yllens bos gwelys

a-dryv kroglenn dewl a ankov,

mes i a veu skattrys, euthyk aga own,

ha troblys gans tarosvannow.

4Hwath ny allas an sorn kudh a's synsis aga gwitha rag own,

mes trosow euthyk a sonas a-dro dhedha,

ha tarosvannow trist gans fasow tewl a omdhiskwedhas dhedha.

5Ny ylli nerth tan ri golow dhedha,

na ny ylli flammow splann an ster

dri golow dhe'n nos kasadow na.

6Nyns esa travyth ow splanna warnedha

marnas tan euthyk hag a dhewis y honan,

hag yn euth bras i a dybi an pythow a welsons

dhe vos gweth ages an welesigeth na ma na yllsons mires orti.

7Kastys aga artow hudel o euver,

ha'ga furneth vostys a veu keredhys gans skorn.

8Rag an re a ambosas chasya dhe-ves an browaghow ha'n troblow a enev klav

o klav aga honan gans own hwarthus.

9Rag kyn nag esa travyth euthyk orth aga ownekhe,

hwath, ow perthi euth a'n bestes gwyls a dremena dresta ha siow serf,

10i eth dhe goll ow krena yn euth,

ow skonya a vires orth an ayr hogen, kyn na ylli bos gohelys yn tyller vyth.

11Rag sherewynsi yw pyth ownek, dampnys der y dhustuni y honan;

reudhys dre gowses, pup-prys ev re gorlewyas an kaletteryow.

12Rag nyns yw own travyth marnas hepkorr an gweres a dheu dhiworth reson;

13ha govenek, fethys der an gwannder ma ynno y honan,

a reken diskians moy ages an kaws hag a dhre an torment.

14Mes der an nos, hag o yn hwir dialloes,

hag a dheuth warnedha dhiworth downderyow ifarn,

i oll a goskas an keth kosk,

15ha treweythyow i a veu chasys gans hager darosvannow,

ha treweythyow i a veu palsyes dre drayturi aga enev aga honan;

rag own desempis hag anwaytys a dheuth warnedha.

16Yndella piwpynag a ve ena a goedhas dhe'n dor,

hag a veu deges yn prison nag o gwrys a horn;

17rag mar pe tiek po bugel deves

po gonisyas ow lavurya y'n gwylvos,

ev a veu dalghennys, hag a borthas tenkys anwoheladow;

rag gans unn chayn a dewlder i oll a veu kelmys.

18Mar teffa gwyns ow hwibana,

po son hweg a ydhyn yn mysk skorrennow ow lesa,

po resyas dowrow ow frosa gans nerth,

19po son garow karregi ow koedha yn-nans,

po bestes gwyls ow poenya hag ow lamma na yll bos gweles,

po son bestes an moyha gwyls ow krommya,

po dasson owth aslamma dhiworth kew y'n menydhyow –

an taklow ma a's palsyas gans euth.

20Rag an bys oll a veu golowys gans golow splann,

ha mos a-dro dh'y lavur heb lett,

21ha war an bobel ma aga honan nos poes a veu lesys,

imaj a'n tewlder hag a veu destnys dh'aga degemmeres;

mes hwath poessa ages tewlder ens i dhedha aga honan.